Ibuyele phezulu iSundowns kwakhathazeka abalandeli bePirates!

Amagowuli
amabini afakwe nguHlompho Kekana noThemba Zwane athathe iMamelodi Sundowns
ayibuyisela enkcochoyi ye-Absa Premier Soccer League emva komdlalo wanamhlanje.
IDowns ibethe ibethe iLamontville Golden Arrows ngamagowuli amabini eqandeni
(2-0) emdlalweni wePSL obumhle ngeyona ndlela eLoftus Versfeld Stadium kobu
busuku. Ukuphumelela kwayo iSundowns kunxunguphalise abalandeli be-Orlando
Pirates ephose ithuba lokubambelela phezulu kwiPSL emva kokubambana neCape Town
City ngo’2-2 kwiveki
ephelileyo eKapa. Ngoku iDowns ihleli ephezulu emva kokuqokelela amashumi
amahlanu anesithandathu amanqaku.

Umdlalo
uqale ngesantya esiphezulu. IDowns ibhakuzelise umnatha emzuzwini wesibini
ngebhola efakwe nguKekana ayinikelwe nguThemba Zwane.  Khange kube kudala, uZwane ufake igowuli
lesibini emva kokuba umdlali wasemva we-Arrows, uMusa Bilankulu, ephise
ngebhola kuGaston Sirino. Iqela ebelindwendwele lisokole emdlalweni ngoba
amandla walo athotywe yidemeshe eyenziwe yiSundowns lingekadlali umdlalo
odibeneyo. Noxa abadlali beSundowns abafaba noSirino, uZwane, uSibusiso
Vilakazi noLebo Maboe bebeyixakekisile iGolden Arrows emva – kodwa ikwazile
ukuphucula indlela edlale ngayo phakathi kwisigaba sokuqala.

Kuyiwe kwixesha
lokuphumla umcimbi sowucalanye kwiqela likaPitso Mosimane. Umdlalo ulawulwe
yiSundowns nakwisigaba sesibini. Yiyo ebihlasela – kodwa Abafana Bes’thende
babuye ekhefini badlala umdlalo ongcono. Ebekhona amathuba okufumana igowuli –
kodwa ngelishwa labo, abakwazanga ukuwasebenzisa. Ngoku iSundowns iya
emdlalweni wokugqibela ikhuthazekile emva kokuphumelela umdlalo obalulekileyo
namhlanje. Ishiya iPirates ngamanqaku amabini emva kokuba ibambene neCape Town
City kwiveki ephelileyo.
Amasandawana aza kudlala neFree State Stars ejingelwa lizembe emdlalweni
wokuvala isizini ngoMgqibelo ngentsimbi yesithathu emalanga.

Mamelodi Sundowns: Onyango, Langerman,
Morena, Arendse, Nascimento, Kekana, Zwane, Coetzee, Vilakazi, Sirino, Maboe.

Amalalela: Pieterse, Lakay,
Mabunda, Ngcongca, Mahlambi, Brockie, Soumahoro

Golden Arrows: Mbaeva, Sibisi, Bilankulu,
Mzava, Lunga, Matloga, Phiri, Venter, Motebejane, Mathenjwa, Mutizwa.

Amalalela: Naicker,
S.Dube, Mathiane, Sibeko, L.Dube, Sabelo, Lamola.