Abafana Bes’thende babambene ngeqanda nePirates

Umqeqeshi we-Orlando
Pirates, uRhulani Mokwena, uza kulala engaxolanga ncam nanamhlanje emva kokuba
iqela lakhe libambene ngeqanda (0-0) naBafana Bes’thende emdlalweni we-Absa
Premiership engeliwuphumelele e-Orlando Stadium ebusuku namhlanje. Amaqela asukelene
zisuka emdlalweni – kodwa ibiyiPirates ebinamandla kwisiqingatha sokuqala. Ithuba
lokuqala elifunyenwe yiGolden Arrows liphoswe nguNkosinathi Sibisi – oqabelise ibhola
ngentloko emva kokunikelwa ngobuchule nguKnox Mutizwa esekhohlo. Iifolosi
zeBucs, uGabadinho Mhlango no-Augustine Mulenga, bazamile ukuvula izithuba –
kodwa bebegadwe ngeyona ndlela ngabadlali beGolden Arrows emva.

Ikwazile ukufumana
ithuba iPirates ngebhola ebekwe phantsi kufuphi nomhlaba kanozinti – kodwa uDanny
Phiri ukwazile ukuqubisana nalo bhola. Kuyiwe kwixesha lokuphumla kungekho qela
elikwazileyo ukubhalisa ebhodini. UFortune Makaringe noXola Mlambo badlale
kakuhle esiswini emdlalweni wanamhlanje – kodwa into engavumanga kukungena
kwamagowuli emnatheni nakwisigaba sesibini. UWayne Sandilands ubethe ngesandla
ibhola ephantse yamnzakalisa sekuphela ixesha emdlalweni. Omabini amaqela
abelene ngenqaku elinye macala emva komdlalo ophele kungekho gowuli
elifakiweyo. Banxunguphele kekambe abalandeli bePirates ngoba iqela labo
linethuba elide ngoku lingasaphumeleli emidlalweni.

Yona
iMamelodi Sundowns izibethele iBloemfontein Celtic ngo’2-1 emdlalweni obuseDr
Molemela Stadium. Umdlalo obuphakathi kweChippa United nePolokwane
City uphele kungeko qela
eliphumeleleyo eNelson Mandela Bay Stadium. Yona iBlack Leopards ibethele
iMaritzburg United kowayo ngo’1-0. ISuperSport United ibethe iBaroka FC ngo’2-0.
IBidvest Wits ibethe iStellenbosch ngo’2-1.

Orlando Pirates: Sandilands, Jele, Maela,
Nyauza, Ndlovu, Nyatama, Mlambo, Makaringe, Dlamini, Mulenga, Mhango.

Amalalela: Delle, Mbekile, Mako, Monyane, Muwowo, Lorch, Mabasa.

Golden Arrows: Sibanda, S.Dube, Sibisi, Mathiane, Lunga,
Makhubela, Shitolo, Phiri, Sabelo, Gumede, Mutizwa.

Amalela: Mbaeva, Nkombelo, Sibiya, L.Dube, Bilankulu, Mitshali,
Lamola.