Yonzakaliswe nguMauricio Affonso sekuphela ixesha iHighlands Park ebixhathisile

IMamelodi
Sundowns inyukele kwindawo yesibini kwi-Absa Premier Soccer League emva
kokubetha iHighlands Park ngegowuli elinye eqandeni (1-0) emdlalweni obuseLucas
Moripe Stadium ebusuku namhlanje. Emva kokuba abadlali abaninzi bengakwazanga ukusebenzisa
amathuba, uMauricio Affonso ubhakuzelise umnatha sekuphela umdlalo emva
kokudlalelwa ibhola entle nguThemba Zwane noGastin Sirino. AmaSandawana aye
emdlalweni ekhuthazekile emva kokubetha AmaZulu ngemvula yamagowuli amahlanu
emdlalweni weTelkom Knockout kwiveki ephelileyo. IHighlands Park
iphantse yatsazisa igazi kuqala emdlalweni ngebhola embi ebikhatywe nguMothobi
Mvala. Kanti uThapelo Morena noThemba Zwane kwelayo icala iSundowns abakwazanga
ukusebenzisa awabo amathuba. Kuyiwe kwixesha lokuphumla ebambene ngeqanda
amaqela emva kokuyeka amathuba amaninzi.

Kuzo
zozibini iziqingatha zomdlalo, uThela Ngobeni ebengoyena nozinti oxakekileyo
ngoba yiSundowns ibihlasela ngamandla. UPitso Mosimane uthe akubona okokuba
ixesha liyahamba kungekho gowuli elivelayo, ukhuphe uLebo Maboe – endaweni yakhe
wafaka ifolosi eyingozi, uMauricio Affonso. Akukho nto ingayizamanga iDowns
ezipalini zeHighlands – kodwa ibhola ibingavumi ukungena emnatheni. Kuthe
sekungeni, u-Affonso ufake igowuli elihle elonzakalise iHighlands Park
emzuzwini wokugqibela womdlalo. Amanqaku amathathu ewafumeneyo namhlanje
iSundowns ayibeke kwindawo yesibini emva kweKaizer Chiefs eza kuqubisana nayo
emdlalweni we-Absa Premiership ojongwe ngamehlo abomvu ngempelaveki. Okuxolise
uPitso Mosimane kukunciphisa umsantsa obuphakathi kweqela lakhe neChiefs ehamba
phambili ngamanqaku amabini.