IPirates isuse iSundowns kwindawo yesibini kwiPSL

Amagowuli
amabini afakwe nguGabadinho Mhango anike i-Orlando Pirates impumelelo eyithathe
yayibeka endaweni entle kwi-Absa Premiership. Amabhakaniya abethe iChippa
United ngamagowuli amabini kwelinye (2-1) emdlalweni obutshisa bhe eNelson
Mandela Bay Stadium ngentlwa yanamhlanje. IChippa United ibibhiyozela iminyaka
elishumi ukusukela mhla yasungulwa nguMnu. uSiviwe Mpengesi ngo-2010
kwelaseNtshona Koloni, eKapa. Ngoku iPirates iyisusile iMamelodi Sundowns
kwindawo yesibini kwiPSL ngoba yona ibidlala neWaydad Casablanca eyibethe ngo’1-0 emdlalweni weCAF
Champions League obuseLoftus Stadium emalanga namhlanje. Abadlali beChippa
United bathezwe amandla zisuka emdlalweni ngebhola efakwe nguMhaga ngepenela
emva kokuba uGregory Damons ewise u-Innocent Maela ebhokisini emizuzwini
yokuqala yomdlalo.

UVeli Mothwa,
unozinti weChippa United, uphinde wayichola emnatheni ibhola emva kokuba
uMhango efake igowuli lesibini emdlalweni. Amagowuli wakhe amabini awafumene
emdlalweni wanamhlanje ongeze kwalishumi elinambini abenayo kwaye uhamba phambili
ngeshumi elinesine lamagowuli ngoku. Khange iziyeke iChippa United. Noxa
ingakwazanga ukuzuza iziphumo ezincumisayo emdlalweni wanamhlanje – kodwa abadlali
bayo bazamile ukulwa. Igowuli lokubika leChippa lifakwe nguAugustine Kwem. Ibinawo
amathuba kwisigaba sesibini iChippa – kodwa ayikwazanga ukuwasebenzisa kakuhle.
Komnye umdlalo wanamhlanje, iGolden Arrowns ibethe iSuperSport United ngegowuli
elinye eqandeni (1-0).

Chippa: Mothwa, Komane, Damons, Modisane, E.Moyo, K.Moyo,
Rakhale, Maziya, Maholo, Twala, Kwem. 

Amalalela: Mazibuko,  Maphanga, Mthethwa,
Nsabiyumva, Lentjies, Maphangule, Gamildien.

Pirates: Sandilands, Maela, Jele,
Nyauza,  Pule, Makaringe, Motshwari, Mabaso,  Memela, Mhango, Lorch.

Amalalela: Delle, Ndengane, Mako, Ndlovu,
Monyane, Shonga, Muwowo.