Ingxoxo
ebikhona phambi kwedabi laseSoweto ngoyena nozinti ofanele adlalele uyivalile
namhlanje uDaniel Akpeyi ngokuthi ancede iKaizer Chiefs ebethe i-Orlando
Pirates ngegowuli elinye eqandeni (1-0) emdlalweni obunzima we-Absa Premiership
obubanjelwe eFNB Stadium ngale njikalanga. Umqeqeshi weChiefs, uErnst
Middendorp, ubonise ukumthemba unozinti wakhe, uDaniel Akpeyi, nangona bekukho
abathi makudlaliswe u-Itumeleng Khune emdlalweni wanamhlanje. UKgotso Moleko noReeve
Frosler baqale umdlalo emaphikweni bencediswa nguDaniel Cardoso no-Eric Mathoho
abayivale kwade kwasekugqibeleni iPirates. Isiqalo somdlalo besisemgangathweni
ophezulu njengesiqhelo. Izitshovutshovu zeZimnyama, uGabadinho Mhango noVincent
Pule, bazamile ukunkqonkqoza kwangoko ezimpondweni zeChiefs – kodwa uMathoho
uzithintele iinzame zabo emizuzwini yokuqala. Amakhosi ukuhlasela nawo
ngoLeonardo Castro noSamir Nurkovic nangani indlela yabo ibivaliwe nguHappy
Jele noNtsikelelo Nyauza emva. Emzuzwini weshumi elinesixhenxe, uDaniel Akpeyi,
uvale ibhola kaMhango ophose amathuba amabini acacileyo ebeza kubeka iPirates
endaweni entle kwisigaba sokuqala.
Kuyiwe kwixesha
lokuphumla iyinkwa nenkwa emva komdlalo obulawulwa yiPirates. Ithathe apho
iyeke khona ke kambe iBucs kwesokuqala ngokuhlasela kwangoko kwisigaba
sesibini. Abadlali abafana noVincent Pule, uLuvuyo Memela noFortune Makaringe
bakwazile ukudala amathuba – kodwa iindlela zabo zivaliwe ngabadlali abafana
noWillard Katsande, uGeorge Maluleka noKearyn Baccus esiswini. UMiddendorp ufake
uKhama Billiat endaweni kaCastro – kwangoko kuye kwabakho intshukumo
ebonakalayo. ULebogang Manyama ubhakuzelise umnatha ethe qelele emva kokufumana
ibhola ekunxele . UMhango, uThembinkosi Lorch noPule ngabona badlali
abakwazileyo ukungena emhlabeni weChiefs oyingozi – kodwa ngenxa ka-Akpeyi,
obevala kwanto eza ezipalini zakhe, abakwazanga ukuwasebenzisa amathuba
abawafumeneyo. Umdlalo wanamhlanje unika Amakhosi asahleli phezulu uqabu emva
kokungaqhubi kakuhle kwimidlalo edlulileyo. Ngokubethwa kwayo iBucs, iphoswe
lithuba lokulwela indebe yokugqibela.
Pirates: Wayne Sandilands, Ntsikelelo Nyauza, Happy
Jele, Innocent Maela, Mthokozisi Dube, Ben Motshwari, Fortune Makaringe,
Vincent Pule, Thembinkosi Lorch, Luvuyo Memela, Gabadinho Mhango
Amalalela: Joris Delle, Siphesihle Ndlovu, Tshegofatso
Mabasa, Augustine Mulenga, Kabelo Dlamini, Alfred Ndengane, Paseka Mako.
Chiefs: Daniel Akpeyi, Kgotso Moleko, Eric Mathoho,
Daniel Cardoso, Reeve Frosler, Willard Katsande, George Maluleka, Kearyn
Baccus, Samir Nurkovic, Lebogang Manyama, Leonardo Castro.
Amalalela: Itumeleng Khune, Anthony Agay, Khama Billiat,
Yagan Sasaman, Bernard Parker, Dumisani Zuma, Siphosakhe Ntiya-Ntiya.
USteve Barker umchaze njengeqhawe uRayners ongcwabe iPolokwane City