Ihleli phezulu iPirates emva kokuvuthulula iCeltic emdlalweni weDiski Challenge!

Igoduka
imisila iphezulu i-Orlando Pirates emva kokuvuthulula iBloemfontein Celtic
ngamagowuli amathathu eqandeni (3-0) emdlalweni weMultiChoice Diksi Challenge
obumhle ngeyona ndlela  eSisa Dukashe
Stadium emini maqanda namhlanje. Amanqaku amathathu ayithathe iPirates ayibeka
phezulu kwiDiski Challenge kwindawo yokuqala. Iphala phambili ngamashumi
amathandathu amanqaku emva kokudlala imidlalo engamashumi amabini anesixhenxe. Emva
kwayo yiBidvest Wits neMamelodi Sundowns ezishiywa ngamanqaku angephi ngokulandelelana
kwazo. USimo Bophela uyibeke endaweni entle kwangoko iPirates emdlalweni ngegowuli
elihle. Amabini afakwe nguLehlohonolo Sepeng noTshepo Kakora kwisigaba
sesibini. Noxa ingalifumananga igowuli lokubika iCeltic – kodwa abadlali bayo
bazamile ukumkhabela uKopano Thuntsane ovale iibhola ezinzima ezipalini.

Isiqingatha
sokuqala besitaka iintantsi. Ezimnyama zibhakuzelise umnatha emzuzwini
wesithandathu ngebhola efakwe sisiququ, uSimo Bophela, ngebhola emshiye ethe
natya unozinti weCeltic, uGiven Machaba. Ibixakekile kakhulu iCeltic kwisigaba
sokuqala ngoba abadlali bePirates abafana noLehlohonolo Sepeng noS’miso Bophela
bebehlasela macala onke. UNqubeko Ntimbane, uNathan Chiliza noLesedi Mohapi
basebenze kakhulu emva. Ekuhambeni kwexesha, abadlali beCeltic baye baswabuluka
nabo, baye bakwazi ukudlala ibhola ecacileyo. Ifolosi yeBucs, Boitumelo Radiopane,
ikhe yafumana ithuba – kodwa ngelishwa layo, ayibhaqanga nto tu. Kuyiwe kwixesha
lokuphumla iPirates ihamba phambili ngegowuli elinye emva kokusilawula isigaba
sokuqala somdlalo.

Abadlali
bakaGlen Salmon bathathe apho bebeyeke khona kwesokuqala isigaba. Badlale umdlalo
ozinzileyo besiya phambili ngezo bhola zabo zibalekayo. Khange baziyekele nabo
abadlali beCeltic abaqeqeshwa ngu-Abram Nteo noDitheko Mototo. URadiopane,
obekhonkxwe kakhulu kwisigaba sesibini, ukhabe ibhola ethe qelele – kodwa khange
imfake engxakini unozinti weCeltic. Iphantse yasengxakini iPirates emva
kwempazamo eyenziwe ngunozinti wayo, uKopano Thuntsane, obambe ibhola emhlabeni
wakhe ebengafanelanga ukuyibamba. Ayikwazanga ke kodwa ukulisebenzisa elo thuba
iCeltic. Emzuzwini wamshumi amabinii anesibhozo kwisigaba sesibini,
uLehlohonolo Sepeng, ufake igowuli lesibini lePirates emva kwebhola entle
eyidlalelwe ngoogxa bakhe. Igowuli lesithathu lePirates lifakwe nguTshepo
Kakora emva kwebhola ebhutyuzwe ngabadlali beCeltic endaweni embi.