Iqela lebhola
ekhatywayo laseLimpopo eliza kudlala kwiPremier Soccer League kwisizini ezayo,
iTshakhuma Tsha Madzhivhandila, lityikitye abadlali ababini basesiswini, u-Oupa
Manyisa noJoseph Molangoane, ngoMvulo. UManyisa noMolangoane ngabadlali
abazibaluleyo emaqeleni abawadlaleleyo ngaphambili. UManyisa, 31, obedlalela
iMamelodi Sundowns, uhambile kuyo emva kokuphelelwa kwesivumelwano sakhe
sengqesho. Naye uMolangoane, 32, obedlalela iKaizer Chiefs, waye wakhululwa
yiyo emva kokuphela kwesivumelwano sengqesho. Bobabini aba badlali babenethuba
elide bengadlali ngenxa yokonzakala. Ukuya kwabo kwiTshakhuma Tsha kuza
kubanika ithuba elihle lokuvuselela izakhono zabo zokudlala ibhola ekhatywayo.
Bobabini aba
badlali batyikitye izivumelwano ezitsha zengqesho zeminyaka emibini
kwiTshakhuma. Eli qela laseLimpopo lidlala kwiGladAfrica Championship esezantsi
kwePSL – kodwa ngoku ilungiselela ukudlala kwinqanaba eliphezulu emva
kokuthenga iBidvest Wits kwinyanga ephelileyo – into eshiye abalandeli bebhola
ekhatywayo bothukile. IBidvest, ebingumnikazi weWits esondela kwikhulu
leminyaka, igqibe kwelokuba iphume ebholeni nangona bekukho amarhe athi
iphakathi kwamaqumrhu amakhulu agacele ukuthatha indawo ka-Absa Bank – oyekayo ukuba
ngumxhasi omkhulu wePSL. Ngenxa yokuhlehliswa kwemidlalo ngenxa yekhorona
exikixe ihlabathi, abadlali abaphelelwe zizivumelwano zabo kumaqela ohlukeneyo –
kuye kwanyanzeleka bakhululwe abangasafunwayo okanye abafuna amaqela amatsha.
Iphele njalo indlela yeSundowns kwiCAF Champions League!