Emva kwexesha
elide iKaizer Chiefs itanasa phezulu kwiPSL, namhlanje iphelile loo ncasa emva
kokuba iquthiswe kabuhlungu yiMamelodi Sundowns ngegowuli elinye eqandeni
emdlalweni we-Absa Premiership obubanjelwe e-Orlando Stadium ngolu rhatya. Igowuli
elincede iSundowns lifakwe sisiququ uGaston Sirino kwisigaba sokuqala emva
kokufumana ibhola entle edlalwe nguRivaldo Coetzee noThemba Zwane. Amakhosi
aphantse enza idemeshe kuqala emdlalweni ngethuba uLebogang Manyama enikela
uBernard Parker ongakwazanga ukukhaba ibhola ecacileyo. Emva koko uDaniel
Akpeyi wenze umsebenzi oncomekayo ngethuba evala ibhola embi ebikhatywe nguLyle
Lakay – odume ngokukhabela iipali ekude kwezi ntsuku. Kuyiwe kwixesha
lokuphumla iSundowns ingaphezulu ngegowuli elinye. Aqale apho ayeke khona
kwisigaba sesibini somdlalo ngokukhulu ukuzimisela.
IChiefs inyuse
igiya futhi kubonakala okokuba inxanelwe igowuli lokulinganisa kwisigaba
sesibini. UHlompho Kekana ukhe wayivavanya iChiefs ngebhola embi ekude – kodwa ngelishwa
lakhe, ifike ethe qwa uAkpeyi ezipalini zakhe. Kuthe kwakubonakala okokuba
akufumaneki nto emva kwemizuzu eliqela kwisigaba sesibini, uErnst Middendorp
ufake uKhama Billiat, uAnthony Akumu noDumisani Zuma wakhupha uLazarous
Kambole, uWillard Katsande noSifama – obeqala ukudlalela iChiefs. UKennedy Mweene
uthintele iibhola eziliqela ebizama ngazo ukubhalisa ebhodini iChiefs. Kwelinye
icala, uPitso Mosimane ufake abadlali abafana no-Andile Jali noLebo Maboe
endaweni kaKekana noZwane. Ngoku iSundowns iwuvalile umsantsa obuphakathi kwayo
neChiefs. Emidlalweni emithathu eshiyekileyo, kulindeleke iChiefs neSundowns
zilwelwe isicoco ngamandla sesizini ka-2019/20.
USteve Barker umchaze njengeqhawe uRayners ongcwabe iPolokwane City