ABanyana Banyana babhale iincwadi zembali yeCOSAFA ngokutsha eBhayi

Iqela lesizwe lebhola ekhatywayo lamantombazana libhale iincwadi zembali ngokutsha izolo ngethuba lizuza impumelelo. ABanyana Banyana bathwaliswe isithsaba emva kokubetha iBotswana ngamagowuli amabini kwelinye (2-1) emdlalweni wokugqibela weCOSAFA obubanjelwe eNeslon Mandela Bay Stadium, eBhayi. Ukuphumelela kwawo uMzantsi Afrika kuthethe ukuthi uphumelele indebe yeCOSAFA amatyeli amane elandelelana waphinda wenza imbali ngokuyiphumelela kasixhenxe. Konke oku kwenzeke emva kokuba aBanyana Banyana bewabethe onke amaqela kuGroup A kungafakwanga nalinye igowuli kubo.

USibulele Cecilia Holweni ufake igowuli lakhe lesibhozo (kwiCOSAFA) emdlalweni wayizolo. Lo nto yamenza wangoyena mdlali ofake amagowuli amaninzi (isibhozo) kwitumente yalo nyaka. Utsazise igazi kuqala uMzantsi Afrika ngebhola efakwe nguye uHolweni – omnye wabadlali abathe baziqaqambisa kwiqela likaDesiree Ellis. Elesibini lifakwe nguGabriela Salgado – kanti eleBotswana lifakwe nguMokgabo Thanda kushiyeke imizuzu emihlanu emdlalweni.

Emva kokusebenzisa abadlali abaliqela abatsha abadibanise nabaxesha elide bedlalela aBanyana Banyana, uDesiree Ellis uzingombe isifuba emva kokuba abadlali bakhe bezenzele imbali. “Ziphelile iintsuku ezingamashumi amabini anesihlanu. Le yimini ebesiyisebenzela. Besisoloko sibathundeza abadlali bethu ngokubaluleka kokuzibonakalisa emidlalweni yale tumente. Umdlalo siwulawule ukusukela ekuqaleni kwawo wade wayokuphela”

“Emva kokuba sifumene igowuli lokuqala, umdlalo wethu uye wehla kancinci. Ngexesha lokuphumla, kuye kwanyanzeleka sibakhumbuze abadlali bethu ukuba umdlalo awukapheli. Sidlale ngabadlali abasebancinane kule tumente. Kuninzi abaseza kufunda nokuza kubakhulisa. Emva kokukhala kwempempe, sivuye kakhulu. Siyazingca ngomsebenzi owenziwe ngabadlali bethu,” utshilo uEllis. Amazwe athathe inxaxheba kwiCOSAFA aquka uMzantsi Afrika, iBotswana, Eswatini, iAngola, iComoros Islands, iMalawi, iZambia, iTanzania neLesotho.