Umqeqeshi we-Al Ahly, uPitso Mosimane, ungqinile namhlanje okokuba ngokwenene umdlali weMamelodi Sundowns, uGaston Sirino, ufuna ukuya kuye eYiphutha. Kwisithuba seenyanga ezintathu ezigqithileyo, uMosimane uyishiyileyo iSundowns waya kwelona qela elikhulu kwizwekazi le-Afrika, iAl Ahly. Waye wahamba namadoda amabini awayesebenza nawo kwiSundowns, kamva wakhweba noCalvin Johnson, asebenza naye njengomncedisi wakhe.
Sekulithuba kukho amahum-hum athi uSirino uyafunwa yiAl Ahly phambi kokuhamba kukaPitso. Iphinde yawuvuselela umdla wayo kuSirino futhi yabeka etafileni imali ephaya eqikelelwa kwisigidi ezilishumi elinesihlanu zerandi (R15-m), yona iSundowns yabe ifuna amashumi alithoba ezigidi zerandi (R90-m) ngokokutsho kwabasemfuthweni wolwazi.
Ethetha nombutho weenthatheli zebhola ekuthiwa yiSafja, uPitso uvumile ukuba uSirino uyafunwa yiRed Devils – wayikhanyela wema ngomlenze omnye eyokuba lo nto ixhokonxwa nguye. “Niyayazi nonke into yokuba iAl Ahly kudala imfuna uSirino nam ndisekwiSundowns. Yinto nje ehleli ezingqondweni zabantu into ethi ndim ofuna uSirino aye kwi-Al Ahly kuba ndingumqeqeshi wayo ngoku.
Ayindicaphukisi lo nto ngoba yinto ekudala ikhona. Niyayazi futhi nabhala ngayo,” utshilo uJingles ebhekisa kwiintatheli ngokokutsho kweKickOff.com. Noxa iSundowns ithe akayi ndawo uSirino – kodwa kukhangeleka ngathi ingathamba xa inokufumana imali eyifunayo kwi-Al Ahly. Kwiveki ephelileyo, uPitso Mosimane uphakamise indebe yeCAF Champions League okwesibini emva kokuba i-Al Ahly ibethe iZamalek ngo’2-1 eCairo International Stadium.
Iphele njalo indlela yeSundowns kwiCAF Champions League!