Iintshatsheli ezikhuselayo zeDStv, iMamelodi Sundowns, zibuyele phezulu emva kokubetha iKaizer Chiefs emdlalweni obutshisa eLoftus Stadium ngorhatya namhlanje. Amakhosi ayophisa emba kokuba ebekwe endaweni yawo ngo’2-0 yiSundowns ebikelemile kowayo emdlalweni weDStv Premiership obujongwe ngamehlo abomvu ngabalandeli bebhola ekhatywayo. Isiqingatha sokuqala siphele iSundowns ihamba phambili ngegowuli elinye eqandeni. Nangona uSamir Nurkovic eqale wankqonkqoza ezipalini zikaDenis Onyango – kodwa yiSundowns etsazise igazi kuqala. Igowuli leDowns lifakwe nguGrant Kekana ngentloko emva kwebhola ebikhatywe nguGaston Sirino ngobuchule.
UKeagan Dolly ngoyena mdlali obeyinkathazo kwiSundowns kwigaba sokuqala – kodwa into angakwazanga ukuyenza kukufaka ibhola emnatheni. UPeter Shalulile noKermit Erasmus, bexhaswa nguThemba Zwane noSirino, ngawona madoda ebethande ukuxakekisa uEric Mathoho neDaniel Cardoso emva. Kwisigaba sesibini, umdlalo unike umdla ngakumbi ngoba iChiefs ebisilwela ukufumana igowuli lokulinganisa, kanti yona iSundowns ibikhusela into enayo. Ibhola kaSifiso Hlanti iphume ecaleni emva kokubethwa nguDenis Onyango. Esiphakathini sesiqingatha sesibini, iSundowns ifumene igowuli lesibini elifakwe nguPeter Shalulile ofumene ibhola ebidlalwe kakuhle nguThemba Zwane kwicala lasekunxele.
Amakhosi anikwe ipenela ngusompempe emva kokuba uRivaldo Coetzee ebambe ibhola ngesandla ebhokisini. ULebogang Manyama, ongene kwisigaba sesibini, uyikhabe ngamandla yabetha epalini. Ngalo ndlela, iChiefs yaba iphoswa lithuba lokulwela ukuphela komdlalo ilingana ngamagowuli okungenani neSundowns ehleli phezulu ngoku kwiDStv Premiership. Ibikokokuqala iChiefs iphulukana nomdlalo kule sizini entsha. Emidlalweni emithathu, iDowns iphumelele yamibini yaze yadlala ntanganye komnye. Yona iChiefs iphumelele kanye, yadlala ntanganye yabethwa komnye. Komnye umdlalo wanamhlanje, iRoyal AM izuze impumelelo yayo yokuqala ngokubetha iChippa United ngo’1-0 emdlalweni weDStv Premiership obubanjelwe eChatsworth Stadium emalanga.
Mamelodi Sundowns: D. Onyango, Morena, Lakay, De Reuck, G.Kekana, Coetzee, Jali, Zwane, Sirino, Erasmus, Shalulile
Amalalela: Mweene, Mkhulise, Domingo, B. Onyango, Kutumela, Modiba, Maema, Safranko, Vilakazi.
Kaizer Chiefs: Bvuma, Dube, Hlanti, Mathoho, Cardoso, Blom, Alexander, Nange, Billiat, Dolly, Nurkovic.
Amalalela: Akpeyi, Frosler, Mabiliso, Njabulo Ngcobo, Parker, Akumu, Manyama, Nkosingiphile Ngcobo, Sekgota.
BUKELA – Usuku lwenkululeko: Izimvo zabantu