Iingxaki zeSwallows zikhule zangangentaba namhlanje emva kokungcwatywa ngemvula yamagowuli amane eqandeni yiCape Town City ebiphethe isabhokhwe emdlalweni weMTN8 obutaka iintlantsi eDobsonville Stadium ebithe gwantla amanzi ngokuhlwa kwanamhlanje. Omabini amaqela aye emdlalweni enamathuba alinganayo emva kokudlala ntanganye emdlalweni wokuqala eKapa kwiiveki ezigqithileyo. IiNyoni zaseDube ziye emdlalweni ngaphandle komqeqeshi wazo, uBrandon Truter, onikwe ikhefu elikhethekileyo ngenxa yokunqaba kweziphumo ezincumisayo. Abadlali bawuqale kakuhle umdlalo ke kodwa ebaleni ebelimanziswe yimvula ebisina ngamandla kwiphondo laseGauteng ngentlwa yanamhlanje.
Iphantse yatsazisa igazi kuqala iSwallows ngebhola entle ephose iipali kancinci ebingqutywe ngentloko nguZaphaniah Mbokoma obefumene ibhola egotywe ngobuchule ekunene nguVuyo Mere. Ifune ukuphindisa nayo iCity ngebhola ehambe phezulu ebikhatywe nguFagrie Lakay obedlalelwe nguThamsanqa Mkhize. Phambi kokusongwa kwesigaba sokuqala somdlalo, uBradley Ralani ubhakuzelise umnatha ngebhola ayifumene kuTerrence Mashego. Emva kwemizuzu embalwa kwisigaba sesibini, iCape Town City ifumene igowuli lesibini elifakwe nguLakay ofumene ibhola kuThabo Nodada. Izamile iSwallows ukuphakamisa umdlalo wayo – kodwa iCape Town City ibisele iwuthathele kuyo umdlalo.
URalani ufake igowuli lesithathu emdlalweni emva kokunikelwa ibhola entle nguNodada obenikelwe nguMduduzi Mdantsane. Ziqhawulwe iimpiko iiNyoni zaseDube kwancameka ngethuba uEdmilson Dove efaka igowuli lesine ngebhola ayingqube ngentloko isuka kuMpho Makola ekoneni. Ngoku iqela lika-Eric Tinkler linethuba lokuphumelela iMTN8 ityeli lesibini eminyakeni nje embalwa likhona. Kodwa kwakufuneka lizimisele kakhulu ukuze libethe iMamelodi Sundowns eyilambeleyo indebe yeMTN8 engekayiphumeleli ukusukela oko iTop 8 yathathwa nguMTN. Umhla nendawo oza kudlalelwa kuyo umdlalo wokugqibela kulindeleke ubhengezwe yiPSL kwiiveki ezizayo.
BUKELA – Usuku lwenkululeko: Izimvo zabantu