UGavin Hunt usenethemba lokuhle noxa ibethwa iChippa United

Umqeqeshi weChippa United, uGavin Hunt, usenethemba leziphumo ezincumisayo nakubeni iqela lakhe libethwe emidlalweni emithathu kwemihlanu eliyidlalileyo kwisizini entsha yeDStv Premiership. Kwiveki ephelileyo, iChippa ibuyele eGqeberha imisila iphantsi emva kokubethwa siStellenbosch ngo’2-1 emdlalweni ebinethemba lokuguqula izinto emva kokubethwa yi-Orlando Pirates ngo’3-1 ekhaya nayiRoyal AM ngo’1-0 ngokulandelelana. Inamanqaku amane kuphela iChippa ewafumene emidlalweni emibini. Phantsi kwayo kukho iMarumo Gallants neTS Galaxy ezinamanqaku amabini iqela ngalinye. Sele iyinto eqhelekileyo eMzantsi Afrika, amaqela agxotha abaqeqeshi xa iqela lingaqhubanga kakuhle emidlalweni yokuqala emihlanu.

Umqeqeshi owaziwayo, u-Owen Da Gama, unikwe uphumaphele yiTS Galaxy kutshanje – kanti yona iSwallows FC umnike ikhefu elikhethekileyo uBrandon Truter. Uxinizelelo likuHunt ngoku ngoba umphathi wakhe, uMnu. Siviwe Mpengesi, ngulo waziwa jikelele ngokugxotha abaqeqeshi xa iqela lakhe lingaphumeleli. Nangona iChippa ingafumenanga iziphumo ezihle emdlalweni ogqithileyo – kodwa uHunt uyincomile indlela edlale ngayo. “Bekufanele ukuba siwuphumelele umdlalo ngoba sithi abadale amathuba amaninzi. Sidlale kakuhle namhlanje nangona singakwazanga ukufumana amagowuli. Okundixolisayo kukuzimisela okuboniswe ngabadlali,” utshilo uHunt emva komdlalo.

Ngoku kufuneka iChippa iqule iligangathe ukuze ikwazi ukufumana amanqaku amathathu xa idibana neSuperSport United eyingozi emdlalweni weDStv Premiership oza kube useSisa Dukashe Stadium emalanga (15:30) ngoMgqibelo. Amatsatsantsa lelinye lamaqela asaqhuba kakuhle kakhulu kwisizini eqhubekayo kwaye aza kulwela impumelelo ukuze avale umsantsa ophakathi kwawo neMamelodi Sundowns ehleli phezulu kwiDStv Premiership. Kunyanzelekile iChippa iphumelele ukuze ikwazi ukufumana amandla okuya phezulu. Inye indlela anokuqinisekisa ngayo ukuhlala kwakhe uGavin Hunt: kukuphumelela imidlalo okanye uza kukhonjwa emnyango.

Imidlalo yeDStv Premiership:

Mgqibelo: AmaZulu vs Kaizer Chiefs @Kings Park Stadium, 15:30; TS Galaxy vs Sekhukhune United @Mbombela Stadium, 15:30; Chippa United vs SuperSport United @Sisa Dukashe Stadium, 15:30; Baroka vs Stellenbosch @Peter Mokaba Stadium, 17:00; Cape Town City vs Orlando Pirates @Cape Town Stadium, 17:00

Cawe: Royal AM vs Maritzburg United @Chatsworth Stadium, 15:30; Golden Arrows vs Marumo Gallants @Sugar Ray Xulu Stadium, 15:30; Mamelodi Sundowns vs Swallows @Loftus Stadium, 15:30