Iintshatsheli zeDStv Premiership ezikhuselayo, iMamelodi Sundowns, azigqugqisi ebaleni nje kuphela – nakumawonga zenza into efanayo. Oku kucace gca okwekati emhlophe ehlungwini ngethuba iSundowns itshayela amawongwa wabaqeqeshi nabadlali abaqaqambileyo kwinyanga yeThupha noyoMsintsi kwindibano ebinamhlanje. Eyona folosi yoyikwayo ebholeni yaseMzantsi Afrika, uPeter Shalulile, ugoduke ephethe iwonga lomdlali wenyanga. Kwelinye icala, abaqeqeshi bakhe uRulani Mokwena noManqoba Mngqithi, bafumene amawonga wabaqeqeshi abaqaqambileyo kwiPSL.
“UShalulile, obekwindawo yesibini ngokufaka amagowuli kwisizini egqithileyo, uyiqale kakuhle kakhulu nale isizini. Emidlalweni emithandathu, sele efake amagowuli amahlanu waphinda wanegalele elibonakalayo kumagowuli alishumi elinanye afakwe yiSundowns kwiDStv Premiership. Indima ayenzileyo uShalulile izibeke endaweni ephezulu iintshatsheli ukusukela ngomhla wokuqala wesizini eqhubekayo. Abanikwe uxanduva lokuchonga boneliseke kakhulu ngumsebenzi owenziwe nguShalulile,” itshilo ingxelo ekhutshwe yiPSL. UShalulile ebekhuphisana noogxa bakhe uRivaldo Coetzee, uDenis Onyango noVictor Letsoalo weRoyal AM oze kakubi.
Abaqeqeshi beSundowns, uMgqithi noRulani, bazuze amawonga ngokudibeneyo emva kokukhuphisana noKaitano Tembo weSuperSport United noJohn Maduka weRoyal AM. Bafumene amawonga abaqeqeshi beDowns ngoba iqela labo liphumelele imidlalo emihlanu ladlala ntanganye komnye. Ngaphezulu koko, uMngqithi noRulani, bawongwe ngenxa yokukwazi kwabo ukwakha iqela elomeleleyo besebenzisa abadlali abadala nabafikayo kwiSundowns. Lona igowuli eliphume phambili lelikaDeon Hotto we-Orlando Pirates awalifaka idlala neStellenbosch FC.
[BUKELA] I-SASSA inqumamise abasebenzi ababini ngokusebenzisa umuthi eofisini