Bawole amawonga abalulekileyo abadlali bombhoxo baseMpuma Koloni

Abadlali bombhoxo baseMpuma Koloni bazuze amawonga abalulekileyo emsithweni obubanjelwe eThekwini kwiphondo laKwaZulu-Natal ngoLwesine weveki ephelileyo. UKapteni weSpringbok, uSiya Kolisi, uthiwe jize ngewonga lomdlali wonyaka eMzantsi Afrika. Embhoxweni wamanenekazi, uLusanda Dumke, ufumene iwonga lomdlali wonyaka ephondweni. Kanti yena uAphelele Fassi ugoduke newonga lomdlali osakhulayo othe waqaqamba kwisizini egqithileyo. UKolisi uvotelwe njengoyena mdlali oqaqambileyo emva kwemidlalo yeqela lesizwe ebinzima kakhulu. Kwiwonga lomdlali wonyaka, le ndedeba yaseGqeberha ibikhuphisana namadoda afana noLukhanyo Am, uDamian de Allende, uEben Etzebeth noMakazole Mapimpi.

Oku kwenzeke emva kokuba ekhokele Amabhokobhoko abethe iBritish & Irish Lions abetyelele eMzantsi Afrika aphumela eAustralia phambi kotyelelo lokuvala unyaka obeluseYurophu. USiya uncome kakhulu oogxa bakhe kwiqela lesizwe ngokwenza umsebenzi omhle enyakeni obusathe gabhu kwidabi leKhorona. “Esikuphumelela siziziqu akubalulekanga ngaphezulu komsebenzi weqela lesizwe. Bonke abadlali ebendikhuphisana nabo bebelifanele eli wonga. Nangona kunjalo – kodwa ndiziva ndiwongekile kakhulu. Eyona nto ibalulekileyo liqela lesizwe kuthi – kodwa sidlule kokudlulileyo ngoku. Ndifuna ukuvuyisana nabo bonke abaphumelele amawonga,” utshilo uKolisi.

Ethetha ngoogxa bakhe, uFassi ofumene iwonga, uKolosi uthethe wenjenje: “Usebenze ngokuzimisela kakhulu. Kuninzi akufundileyo kwiSpringbok emva kokudlala emidlalweni ethileyo kanti sidlalela iqela elinye thina sobabini,” utshilo.” Njengomntu osoloko ekhuthaza amanenekazi adlala umbhoxo, uKolisi uthethe wenjenje ngoDumke odlalela iBorder Ladies: “Ndingumntu okuthandayo ukuxhasa amanenekazi ngoba azimisele kakhulu. Sifuna ukuqinisekisa ukuba afumana inkxaso epheleleyo kwaye ndiyazingxa ngomsebenzi awenzileyo.”