Ibhola ekhatywayo yamanenekazi ifumene ufunqu kwiphondo laseMpuma Koloni emva kokuba iCity Lads Ladies inyukele kwinqanaba loompondozihlanjiwe. Amanenekazi eCity Lads aza kudlala kwiHollywoodbets Super League emva kokufumana indawo yesibini kwiNational Sasol League. Kwiveki ephelileyo. iCity Lads Ladies iphiswe yindebe kancinci emva kokuba ibethwe yiVasco Da Gama ngamagowuli amane kwamathathu (4-3) emdlalweni obutaka iintlantsi eKing Zwelithini Stadium, KwaZulu-Natal, kwiveki ephelileyo. Ngethamsanqa, omabini amaqela aphezulu anyukele kwinqanaba elingasentla ebholeni yaseMzantsi Afrika.
Ngoku iMpuma Koloni iza kumelwa yiCity Lads neThunderbirds Ladies yaseGcuwa kwiHollywoodbets Super League. Lo nto ithethe ukuthi inani labadlali bephondo abadlala kwinqanaba eliphezulu ebholeni ekhatywayo liza kufunquka nemidlalo eza kufunyanwa ngabalandeli bebhola yamanenekazi iza kwanda. Njengokuba iVasco Da Gama ibe ziintshatsheli zeNational Sasol League, iye yafumana imali engamakhulu amabini amawaka erandi (R200 000) ekulindeleke ayincedise xa isenza amalungiselelo wesizini entsha. Yona iCity Lads izuze ikhulu lamawaka erandi (R100 000). Umphathiswa weZemidlalo kwiphondo leMpuma Koloni, uNksz.
Fezeka Nkomonye, uzamkele ngovuyo iindaba zokunyuselwa kweCity Lads watsho evuyisana nayo. “Sithi huntshu kwiCity Lads emva komsebenzi omhle ewenzileyo kwiSasol League. Yinto entle kakhulu le eyenzeke ephondweni lethu. Njengomntu osoloko eshumayela ukubandakanywa nokunikwa kwamanenekazi amathuba kwezemidlalo, ndonwabe kakhulu emva kwento eyenziwe liqela lebhola ekhatywayo lamanenekazi,” utshilo uNkomonye. UMphathiswa uthe uyalele abaphathi besebe lakhe ukuba bakhangele indlela iThunderbirds Ladies neCity Lads ezinokuxhaswa ngazo phambi kokuqala kwesizini entsha yeHollywoodbets Super League.
BUKELA – Usuku lwenkululeko: Izimvo zabantu