Njengokuba amanye amaqela sele ebafumene abaqeqeshi abaza kuwaqeqesha xa kuqala isizini kwinyanga entsha, yona iChippa United isakhangela owayo. Oku kudizwe liqela kwingxelo ebhaliweyo efakwe kuFacebook ngethuba lisazisa ukunqumamisa kwalo uKurt Lentjies emini namhlanje. Asixelwanga isizathu esibangele uLentjies anikwe ikhefu elikhethekileyo emva kokusindisa iChippa United ezembeni kwisizini egqithileyo. “Oku kukwazisa ukuba iChippa United isakhangela umqeqeshi omtsha. Ukusukela oko kwathi kwahamba uGavin Hunt, iqela lethu zange libenaye umqeqeshi osisigxina,” itshilo iChippa United.
“Ngelo xesha bekubambe uKurt Lentjies njengomqeqeshi. Njengokuba iqela lisakhangela umqeqeshi omtsha, kugqitywe kwelokuba uKurt Lentjies anikwe ikhefu elikhethekileyo. Iqela lakubuya lazise xa kukho into entsha,” itshilo iChippa United. Emva kokugxothwa kukaGavin Hunt, uMnu. Siviwe Mpengesi, wanika uKurt Lentjies uxanduva lokuqeqesha iqela kwade kwaphela isizini. Izamile iChippa yade yaphela isizini ikude ezembeni. Abalandeli bebhola bebelindele uLentjies axhuzule imikhala nakwisizini elandelayo athengelwe nabadlali. Ayenzekanga lo nto.
Endaweni yoko, kubonakala ngathi uza kukhonjwa emnyango. Asikacaci kakuhle isizathu sokwenziwa kwakhe ikheswa yiChippa United ayisindise ezembeni eqala ukuqeqesha. Njengokuba abadlali sele bebuyele enkampini, uLentjies kuthiwe makayeke ukulolonga abadlali ngokokutsho kwamajelo eendaba. Omnye umntu ekuthiwa ulahlile nguMorgan Mmamila obengumphathi weqela ekwalisekela-mqeqeshi kwisizini egqithileyo. Ingxelo ithi iChippa United sele ityikitye umdlali wasemva, uAzola Ntsabo, obedlalela iAll Stars. Abanye abadlali ekulindeleke babhengezwe nguSirgio Kammies noBrooklyn Poggenpoel.
BUKELA – Usuku lwenkululeko: Izimvo zabantu