Ayantywizisa AmaZulu emva kokuquthiswa kabuhlungu emdlalweni wawo wokuqala weCaf Champions League. Usuthu luquthiswe ngegowuli elinye eqandeni (1-0) liqela laseMalawi ekuthiwa yiNyasa Big Bullets FC emdlalweni obubanjelwe KwaZulu-Natal ngokuhlwa kwanamhlanje. AmaZulu liqela lesibini elimele uMzantsi Afrika emidlalweni yeCaf emva kokuvala isizini yeDStv Premiership ka-2020/21 ekwindawo yesibini emva kweMamelodi Sundowns eye yaziintshatsheli. Njengokuba indlela oludlale ngayo Usuthu yothuse umzi, kukho ithemba ebantwini baseMzantsi Afrika lokuba luya kwenza umsebenzi oncomekayo nangona luqala ukudlala imidlalo yeChampions League. Kuyiwe kwixesha lokuphumla iNyasa Big Bullets inkqenkqeza phambili ngegowuli elinye eqandeni.
Emzuzwini wamashumi amathathu, uChiukepo Msowoya ubhakuzelise umnatha emva kwempazamo eyenziwe nguVeli Mothwa. Usuthu luzamile ukuqokelela umdlalo walo lusiya phambili – kodwa iBig Bullets yalile ukuvula. Iqela laseMalawi lidlale ngabadlali abalishumi emva kokuba uYamikani Fodya ekhutshwe ngekhadi elibomvu ngenxa yokudlala kakubi. Iqela likaBenni McCarthy libuye kwisigaba sesibini lifuna igowuli lokulinganisa – kodwa alikwazanga ngethuba ibhola kaSiphelele Mthembu iqabela ngaphezulu kweepali. Azamile AmaZulu ukudala amathuba emdlalweni – kodwa ithamsanqa belichasele okwelanga. Ngoku aza kuya eMalawi emdlalweni wesibini ephantsi koxinizelelo emva kokungakwazi ukuphumelela ekhaya.
URonwen Williams ucelela inkxaso yabalandeli beChiefs nePirates!