Baxter: Le yinto ekufuneka siyenze ngamaxesha onke

Umqeqeshi weBafana Bafana, uStuart Baxter, uvuya okosana emva kokuba iqela lakhe lifumene impumelelo ebalulekilyo kumdlalo wayizolo wokuzibekela indawo kwi-2019 Africa Cup of nations. UMzantsi Afrika ufundise isifundo iNigeria ngethuba uyibetha ngo’2-0 kumdlalo obubukelwe ngabalandeli bebhola abasondele kumawaka akumashumi amathathu, eGodswill Akpabio Stadium, kwisixeko sase-Uyo. Kokwesibini iBafana Bafana iphuma e-Uyo ingabethwanga, ngaphambili yadlala ntanganye neSuper Eagles eyaphetha ingayanga kwi-2015 Afcon eyayisingathwe yi-Equatorial Guinea.

Iqela lesizwe loMzantsi Afrika liye kulo mdlalo lingazange layibetha iNigeria kumdlalo obalulekileyo ukusukela ngonyaka elabuyela ngawo kwibhola yehlabathi. Kodwa nangona kunjalo, phantsi kukaStuart Baxter ngo-2004, iBafana Bafana yazuza impumelelo kumdlalo wobuhlobo. UBaxter unyathelela phezulu emva kokubetha iNigeria ngento ayichaza njengesitayile soMzantsi Afrika. “ABafana Bafana bayiqhiyazisile iNigeria, bayihlakaza ngokunikela ngokukhawuleza kanye le ndlela kudlalwa ngayo ibhola eMzantsi Afrika,” utshilo uBaxter kwiSafa.net.

UBaxter uthi le yimpumelelo ebalulekile kweli lizwe emva kwamalungiselelo abemafutshane. “Ndifumene imiyalezo emininzi kakhulu esuka eMzantsi Afrika evuyisana nathi kwaye isangena nangoku. Lo nto ibonisa kakuhle ukuba le mpumelelo ibalulekile. Yindlela esiphumelele ngayo ebangela lo nto. Ukubetha iNigeria emva kwamalungiselelo amafutshane kangaka, uhambo olude oluya entshona ye-Afrika, zezinye zezinto ezibangela abantu bachukumiseke yile mpumelelo. Ebholeni besingaxhamazeli, iibhola zethu zibethe ipali kwade kwaka bini emdlalweni; ndonwabe gqithi. Le yinto ekufuneka siyenze ngamaxesha onke,” uvale ngalo mazwi uBaxter.

Amagowuli amabini afakwe nguTokelo Tantsie noPercy Tau kwisigaba sesibini somdlalo ngawo ancede iBafana Bafana kwidabi lase-Uyo.

Nigeria: Akpeyi; Shehu, Awaziem, Ekong, Elderson; Onazi, Ndidi, Etebo; Simon, Iwobi (Musa 60′), Iheanacho.

Bafana Bafana: Itumeleng Khune, Rhamahlwe Mphahlele, Tebogo Langerman, Eric Mathoho, Thulani Hlatshwayo (Kapteni), Dean Furman, Bongani Zungu, Themba Zwane, Keagan Dolly, Sibusiso Vilakazi (Lebohang Manyama 64′), Tokelo Rantie (Percy Tau 80′)