Kukho ukuhlaziyeka
kwethemba ebadlalini emva kokuba iChippa United etsala nzima kule sizini ibethe
AmaZulu ngamagowuli amabini eqandeni (2-0) emdlalweni we-Absa Premiership
obubanjelwe ePrincess Magogo Stadium namhlanje ebusuku. Ngumdlalo wokuqala lo
uphunyelelwe yiChippa United namhlanje emidlalweni elishumi esele iyidlalile
kule isizini. Amagowuli weChippa United namhanje afakwe nguWilliam Twala (omabini)
kwisigaba sesibini somdlalo kwelo bala ebekudlalelwa kulo limanzi
kukaNorman Mapeza, ngumdlalo wesibini lo ewuphumeleleyo namhlanje iChippa.
Kowokuqala, iChippa yabetha iBloemfontein Celtic ngo’1-0 emdlalweni weTelkom
Knockout obuseSisa Dukashe Stadium kwinyanga ephelileyo. UMapeza wathatha
indawo kaClinton Larsen owagxothwa nguChippa Mpengesi emva kwemidlalo emihlanu,
qha!
Isigaba sokuqala
siphele kungekho qela elikwazileyo ukubhalisa ebhodini. Amakhwenkwe kaMapeza
ngawona adlale umdlalo odibeneyo futhi ehlasela esebenzisa uKwem, uTwala
noThabo Rakhale – obuyele ebholeni emva kokukhonkxwa kukonzakala.
Bekungelulanga kumacala omabini ngenxa yebala ebelimanziswe yimvula. AmaZulu
azamile ukudlala nokudala amathuba – kodwa iibhola zawo beziqhawulwa ngabadlali
beChippa phambi kokudala ingozi. Impumelelo iza kunika iChippa amandla okulwa
emidlalweni ezayo. Nangani iphumelele – kodwa kunyanzelekile iyiphumelele
phantse yonke imidlalo yayo phambi kokuvala unyaka ukuze ingangeni engxakini njengakwisizini
egqithileyo ephephe izembe ngomzuzu wokugqibela. Ngoku iChilli Boys iya kudlala
neBlack Leopards ngomhla wamashumi amabini anesixhenxe eNelson Mandela Bay
Stadium ngecala emva kwentsimbi yesixhenxe ngorhatya.
Iphele njalo indlela yeSundowns kwiCAF Champions League!