Izikhotha amanxeba iBlack Leopards ngale njikalanga emva kokungonjwa yiChippa United ngomwasalala wamagowuli amathathu eqandeni emdlalweni weDStv Premiership obubanjelwe eThohoyandou Stadium. Kokokuqala iChippa United iphumelela ngendlela encumisa njengale yanamhlane kule sizini phantsi kukaDan Malesela othathe indawo kaLehlohonolo Seema.
Iqela ebelidlalela ekhaya liphantse lenza umonakalo ngebhola ebethe epalini ikhatywe ngu-Edwin Gyimah ngomzuzu weshumi elinesihlanu. Emva koko iChippa United ibhalise igowuli layo lokuqala ngebhola efakwe ngu-Andile Mbenyane. Kuyiwe kwixesha lokuphumla amakhwenkwe kaDan Malesela ephala phambili ngegowuli elinye.
Kwesesibini isigaba, iChippa United ibhakuzelise umnatha ngegowuli elifakwe nguMaloisane Mokhele emva kokufumana ibhola entle ebigotywe nguPeter Maloisane. Kuye kwacaca ukuba iqela likaDylan Kerr lijongene nobunzima obukhulu bokoyisa iChippa kwisigaba sesibini.
Uxinizelelo lukhokelele ekukhutshweni kukaGyimah ngekhadi elibomvu emva kokudlala kakubi umdlali weChippa. Igowuli lesithathu lifakwe ligqala, uKurt Lentjies, ongene endaweni ka-Augustine Kwem kwisigaba sesibini. Ngoku kuthe huu kwiChippa ephumelele umdlalo wayo wesibini emidlalweni emithathweni. Ihleli kwindawo yeshumi elinanye emva kokuqokelela ishumi elinantathu lamanqaku emidlalweni elishumi elinantathu.
Leopards: Mendes, Makobeloa, Khumalo, Gyimah, Masia, Mthethwa, Maluleke, Ononogbu, Karuru, Makgetlwa, Kabwe.
Amalalela: K.Ndlovu, Mashoene, Abubakar, T.Ndlovu, Thutlwa, Hlongwane, Ramagalela, Nthatheni.
Chippa: Mtshali, Nsabiyumva, Damons, Hanamub, Nhlapo, Mdlinzo, Konqobe, Mokhele, Mbenyane, Maloisane, Kwem.
Amalalela: Watenga, Mogakwe, Mthethwa, Dinge, Cezu, Sibeko, Lentjies, Eva Nga Bienvenu, Laffor
Iphele njalo indlela yeSundowns kwiCAF Champions League!