UDan Malesela
uncumile nangona engawafumenanga onke amanqaku. Igowuli elifakwe nguThatayaone
Kgamanyane lihlangule iChippa United kumdlalo ophele ngo’2-2 kobu busuku eSisa
Dukashe Stadium. Abalandeli
abadele ingqele eMdantsane bagoduke bekhululekile emva kokuba iqela labo
likwazile ukufaka igowuli lokulinganisa kumzuzu wokugqibela emdlalweni.
Lusekhona uxinizelelo kuDan Malesela emva kokuba iqela lakhe lingakwazanga
ukufumana impumelelo kumdlalo walo wesine kule sizini. Amagowuli weLeopards afakwe nguKhuliso Mudau
kumzuzu wesithandathu noTumelo Khutlang. AweChippa United afakwe ngu-Andile
Mbenyane noThatayaone Kgamanyane. Ukungaphumeleli kwayo iLeopards kuyibeka
kwindawo yesine kwiPSL emva kokuqokelela amanqaku amahlanu kwimidlalo emithathu
kwisizini entsha.
Emva kokudlala
isiqingatha sokuqala esihle, amaqela omabini aye kwixesha lokuphumla ebambene
ngegowuli elinye macala. Itsazise igazi kuqala iBlack Leopards ngegowuli
elifakwe nguKhuliso Mudau kumzuzu wesithandathu. Ziphendule iiChilli Boys nazo
emva kwemizuzu emithathu ngebhola efakwe ngentloko ngu-Andile Mbenyane oqale
umdlalo namhlanjenakubeni engumdlali othanda ukuwuqala ngaphandle umdlalo. Omabini amaqela
awuphakamisile umdlalo wawo. UPhathutshedzo noKarabo Tshepe bebeyiphethe
mantsantsa iChippa United – maxa wambi ehlangulwe nguDaniel Akpeyi –
okunyanzeleke asebenze ngenxa yokuyekelela kwabadlali bakhe basemva. UKert Lentjies
noThabo Rakhale bawuthathele kubo umdlalo. Lo nto inike amandla uMark mayambela
okuhlasela ekunene obesibenzisana noGamildein obezama noxa ebefuthanyiselwe
ngabadlali beLeopards emva.
Isiqingatha
sesibini siqale ngezinga eliphezulu naso – kodwa iLeopards ikhawuleze
yangcangcazelisa umnatha kwakhona ngebhola efakwe nguTumelo Khutlang emva
kokuba uDaniel Akpeyi eyixhimfele ngamanqindi yangena ebaleni. Emva koko
iLeopards ihleli emva ngelizama ukukhusela amagowuli wayo kwiChippa United
ebiquqa ibuyelela kumhlaba wayo. UDan Malesela ukhuphe u-Andile Mbenyane,
ongabonakalanga kwisigaba sesibini, noRuzaigh Gamildien – iindawo zabo
zithathwe nguBuyani Sali noThatayaone Kgamanyane. Injongo kaMalesela
ibikukuhlasela ukuze afumane igowuli lokulinganisa. Ukubethwa kweChippa United
kuthetha ukuthi yiyo ejijisana netshoba ekugqibeleni kuluhlu lwamaqela ePSL. Igowuli
elifakwe ngomzuzu wokugqibela liyihlangule kakhulu iChippa ebisengxakini.
Chippa United: Daniel Akapeyi, Zitha Macheke, Thabo Ntethe,
Mark Mayambela, Ruzaigh Gamildien, Thamsanqa Sangweni, Andile Mbenyane, Gerald
Modisane, Tebogo Tlolane, Kurt Lentjies, Thabo Rakhale.
Amalalela: Veli Mothwa, Thatayaone Kgamanyane, Frederic
Nsabiyumva, Tebogo Makobela, Boikanyo Komane, Buyani Sali, Daine Klate.
Black Leopards: Abelhbola Aifimi, Thivhavhudzi Ndou. Tsheamo
Mashoene, Djunga Jean Munganga, Marks Munyai, Phathutshedzo Nange, Khuliso
Mudau, Eden Nene, Mwape Musonda, Karabo Tshepe, Tumelo Khutlang.
Amalalela: Nyiko Sibanda, Lesedi Kapinga, Joseph Mhlongo,
Lifa Hlongoane, Thabiso Mokoena, Themba Ndlovu, Rotshidzwa Muleka.
Iphele njalo indlela yeSundowns kwiCAF Champions League!