iMamelodi Sundowns ifumene amanqaku amathathu emva kokubethela iGolden Arrows kowayo

Igoduke namanqaku amathathu iMamelodi Sundowns emva kokuba ibethe iGolden Arrows ngegowuli elinye eqandeni emdlalweni weDStv Premiership obubanjelwe eSugar Ray Xulu Stadium ngenjikalanga yanamhlanje. Umdlalo ubeshushu usaqala kwisigaba sokuqala njengesiqhelo xa kudibene la maqela mabini. Abafana Bes’thende badlale umdlalo ophucukileyo kwisigaba sokuqala besiya phambili ngesantya esiphezulu. UPule Mmondi uphose ithuba lokubeka iGolden Arrows endaweni entle. Ibhola yakhe iphume ecaleni kweepali emva kokudlula ku-Aubrey Modiba obedlala kwicala lasekunxele.

Amasandawana adlale umdlalo wawo wesiqhelo esebenzisa uJali noDomingo njengeenjini zawo embindini webala. UNqobeko Dlamini akakwazanga ukusebenzisa elinye ithuba engelincede iGolden Arrows emva kokufumana ibhola kuMthokozisi Dube. Emva kokuphela kwesiqingatha sokuqala kungekho qela elikwazileyo ukubhakuzelisa umnatha, isiqingatha sesibini siye sanika umdla ngakumbi ngoba amaqela omabini ebenyuse umxakatho. Phambi kokuphela kweyure kudlalwa, uGaston Sirino ufake igowuli ekube kuphela kwalo emdlalweni.

Abafana Bes’thende, abaqeqeshwa nguLehlohonolo Seema, bazamile ukulwa futhi bebonakala ukuba bafuna igowuli shushu. Bafumene ipenela kushiyeke imizuzu elishumi elinane kuphele umdlalo emva kokuba uSiyabonga Khumalo edlalwe kakubi nguKhuliso Mudau emhlabeni kanozinti. UMichael Gumede uphose ithuba lokufaka igowuli lokulinganisa ngethuba ekhabela ibhola ecaleni. Amanqaku amathathu abethelele iSundowns kwindawo ephezulu kwiDStv Premiership njengokuba iza kudlala umdlalo wesibini weCAF Champions League ngempelaveki.

Golden Arrows: Mbaeva, Zuke, Sibisi, Dlamini, M.Dube, Cele, Mbhele, Mmodi, Ndwandwe, Magubane, Mutizwa.

Amalalela: Gumede, Mantshiyane, Sibiya, Ndlovu, L.Dube, Magawana, Khumalo, M.Gumede, Fikizolo.

Mamelodi Sundowns: D. Onyango, Modiba, Mudau, B. Onyango, Lebusa, Jali, Sirino, Domingo, Kutumela, Vilakazi, Shalulile.

Amalalela: Goss, Safranko, Lakay, Nascimento, Mkhulise, Maluleka, Maema, Kapinga, Morena.