Ibuyile kwakhona imidlalo yeHollywoodbets Super League! Amaqela wamantombazana adlala ibhola ekhatywayo aphuma kumaphondo onke aza kudibana ngempelaveki kumabala akwiindawo ngeendawo ngokwahlukana kwazo eMzantsi Afrika. Ngoku iHollywoodbets Super League iqhayisa ngamaqela alishumi alinantandathu emva kokunyuselwa kwamabini abedlala kwiSasol National Championship kwisizini egqithileyo. Okuza kuncumisa abalandeli bebhola ekhatywayo eMpuma Koloni kukuba iza kumelwa ngamaqela amabini kwisizini entsha eza kuphehlelelwa ngoMgqibelo. Loo maqela yiThunderbirds Ladies yaseGcuwa neCity Lads Ladies yaseGqeberha esuka kwiSasol League egxila emidlalweni yamaphondo.
Nakule isizini, iqela eliphumeleleyo liza kunikwa izigidi ezibini zerandi lona (R2-million) elifumene indawo yesibini lakufumana isigidi esinye serandi (R1-million). Abatshakazi kwinqanaba eliphezulu, iCity Lads, baza kudibana neWestern Cape University emdlalweni weHollywoodbets oza kube useWolfson Stadium. Kweminye imidlalo: iBloemfontein Celtic Ladies yamkela iVasco Da Gama emdlalweni oza kube useCentral University of Technology. IGolden Ladies iza kungquzulana neThunderbirds emdlalweni oza kube useMahikeng. Yona iCoal City Wizards yamkela iJohannesburg University, ePuma Stadium.
ITouch FC yaseLimpopo iza kudiba neTsunami Queens emdlalweni oseGiyani Stadium. Logama iMa-Indies FC iza kudibana neentshatsheli ezikhuselayo iMamelodi Sundowns Ladies. Yonke imidlalo kulindeleke idlalwe ngoMgqibelo umhla wamashumi amabini anesithathu kuTshazimpuzi. Okuhle ngesizini entsha kukuba imidlalo iza kuya phantse kuwo onke amaphondo futhi iza kuvezwa nakuSABC. Amaqela amabini avale isizini esezantsi aza kuthotyiselwa xa kuphela unyaka kunyuselwe amabini asuka kwiSasol National Championship. Abaphathi beSouth African Football Association kulindele bathathe isigqibo ngemidlalo ekufanele idlalelwe kwiphondo laKwaZulu-Natal exikixwe kakubi zizikhula kwiveki ephelileyo.
Iphele njalo indlela yeSundowns kwiCAF Champions League!