Ilinge lesibini le-Orlando Pirates lokuphumelela indebe yeCAF Confederation liphanzile. Oku kwenzeke emva kokuba ibethwe yiR.S. Berkane ngo’5-4 kumapenela emdlalweni wamagqibelakankqoyi obuseGodswill Okpabio Stadium namhlanje eNigeria. Emva kwexesha elongezelelweyo, umdlalo uphelel ebambene ngo’1-1. Ibuyela ekhaya intywizisa iPirates nangona wonke umdlalo ubuphethwe yiyo. Yona iBerkane ifumene ithuba elinye yalisebenzisa. Ezimnyama ziphoswe lithuba lokwenza imbali nokuzuza imali ekumashumi amabini ezigidi zerandi (R20-million) efunyanwe liqela eliphumeleleyo. Emva kokuphoswa yindebe yeCAF Confederation kubini kwiminyaka edlulileyo, iBerkane ide yayizuza impumelelo.
Isigaba sokuqala siphelile kungekho qela elifane ukugoba iphondo. Noxa kunjalo, umdlalo ubunawo amathuba avelileyo. Emzuzwini wesithathu umdlalo uqalile, uDeon Hotto uphose ithuba lokubeka iPirates phambili emva kokukhaba kancinci ibhola ephambi kokanozinti. Ufumene ibhola entle ebisuka kuKabelo Dlamini. Emva kwakhe, iHappy Jele ukhe wazama ngentlok yakhe – kodwa ngelishwa lakhe, ibhola yakhe ibhabhe phezu kweepali. Akukho nto ingako eyenziwe yiBerkane kwisigaba sokuqala ngaphandle kokuchitha iibhola zabadlali bePirates ebingabona banamandla emdlalweni.
Khange sahluke isigaba sesibini kwesokuqala ngoba naso khange kubekho qela elikwazileyo ukubhakuzelisa umnatha. URichard Ofori zimbalwa kakhulu iibhola ebeziyingozi kuye. Abadlali bePirates afana noBen Motshwari noThembinkosi Lorch bawulawule umdlalo – kodwa uPeprah akakwazanga ukwenza nto ngoba ebegadiwe kakhulu ngabadlali beBerkane yaseMorocco. Emva kokungakwazi ukusebenzi intaphane yamathuba, imizuzu engamashumi alithoba yomdlalo iphelile. Kwixesha elongezelelweyo, iBerkane ibhakuzelise umnatha emva kokufumana ipenela. Ngethamsanqa, iPirates ifumene igowuli elifakwe nguLorch. Emva kokubambana, kuyiwe kumapenela. Iwe phantsi iPirates ngenxa yepenela ephoswe nguThembinkosi Lorch.
IPirates iya phambili kwiNedbank Cup emva kokunyathela iChippa United ekhaya