IiChilli Boys zeMpuma Koloni zikhulule abadlali ababini abaziintsika baya kwi-Orlando Pirates. Usihlalo weli qela lizinze eBhayi, uSiviwe “Chippa” Mpengesi, ucatshulwe ngamajelo eendaba namhlanje ekugqina ukuhamba kukaJames Okwuosa noMarc van Heerden. AmaBhakaniya azakunika iChippa United abadlali abane. Kwenziwa utshintshiselwano ngentetho eqhelekileyo. UJustice Chabalala, uDonald Mokondelela, uSello Japhta noNkosinathi Mthiyane beza eBhayi.
“Siyavuya ngoba sikwazile ukufumana abadlali abasemgangathweni ophezulu endaweni yabadlali esibakhululeyo,” utshilo uMpengesi kwiKickOff.com
Bobabini aba badlali bebeziintsika zeqela likaDan Malesela ukusukela ekuqaleni kwesizini yePSL ka’2016/17. UVan Heerden wagaleleka ekuqaleni kwale sizini esuka kwiqela elidlala kwaFirst National Division, AmaZulu FC. Wafika wenza umahluko omkhulu kwiphiko lasekunxele. Ukuthathwa kwakhe yiPirates akothusi kwaphela ngoba sekuyiminyaka eliqela imfuna.
UJames Okwuosa ebethathiwe naye yiBcs ekupheleni kwesizini ka’2015/16 – kwathi kwakufika uMuhsin Ertugral kwacaca ukuba akangeni ncam kwindlela awayefuna idlale ngayo iPirates. Njengokuba engasekho kweli qela laseGoli – iphindele kuye iPirates. Ezi ziinguqu ezingaphazamisa iChippa United phaya kubadlali basemva.Isigaba sokuqala sale sizini siphele kusekho ukungagqibeleli kwindlela edlala ngayo emva.
Nayo kwelinye icala iBucs inengxaki yokungahlangani kwabadlali basemva, ubukho bakhe uJames Okwuosa bungawenza umahluko omkhulu kakhulu. NguJustice Chabalala kuphela kwaba badlali okwazileyo ukudlala kule sizini kwiPirates, abanye aba bathathu abakwazanga ukudlala. Kunokwenzeka badinge ixesha lokuziqhelanisa neemeko ngenxa yomhlwa emilenzeni yabo. UMthiyane ubuyela kwiChippa ayishiye ekupheleni kwesizini ephelileyo emva kokudlala kakuhle kakhulu.
Iphele njalo indlela yeSundowns kwiCAF Champions League!