ISuperSport United iwaphinde kula ndawo Amathambo!!!

Amatsatsantsa
a Pitori ayikhusele indebe yawo ngokubethela oogqirha nezicaka i-Orlando
Pirates! 

Eli qela lasePitoli liphakamise indebe yeNedbank amatyeli amabini elandelelana
emva kokubhuqa iPirates ngo’4-1 kumdlalo obushushu ngeyona ndlela eMoses
Mabhida Stadium kobu busuku banamhlanje. 

Kwakolu khuphiswabo kunyaka ophelileyo,
iqela likaStuart Baxter lafumana le ndebe ngokubetha iBucs ngo’3-2 kumdlalo
owawusePeter Mokaba Stadium. Kanti lo mdlali uza isilonda sokubethwa kwePirates
ngo’6-1 kwayile SuperSport singekapholi kakuhle. 

ISuperSport United ithe
ndlela-ntle kuStuart Baxter ngesitayile kumdlalo wakhe wokuqgibela kuyo
njengokuba ezakuthatha iintambo ngokupheleleyo kwiBafana Bafana ngokupheleleyo
ukusukela kwiveki ezayo. 

UBradley Grobler ufake amagowuli amabini kulo mdlalo,
elinye lifakwe nguJeremy Brockie noKingston Nkatha – ngalo ndlela babe banika
iSuperSport United ephoswe yindebe yePSL emva kokuqala kakuhle kwisizini
ephelileyo.

UBradley
Grobler ufune ukuba yingxaki kwakumzuzu wokuqala – kodwa uye wabhaqwa
ngusompempe ukuba ulalele. Emva koko uDove Wome no-Issa Sarr bahlanganise
iibhola ezingaphumelelanga ekugqibeleni. Isantya somdlalo besiphezulu ukusukela
ekuqaleni ngoba bekubonakala ukuba la maqela afuna ukubhalisa kwangoko
ebhodini. UGrobler, obeyingxaki okwezinyo eliqaqambayo, uphinde wafumana ibhola
ebigotywe ekunxele – kodwa akayifumananga kakuhle ngonyawo. Impazamo eyenziwe
yiPirates kukuvumelela Amatsatsantsa a Pitori ayihlasele ngoba intaphane
yeekona ziyinxaphisile iPirates.

UThabo Rakhale,
obehlasela macala onke, ebezama ukufumana uWome okanye uThamsanqa Gabuza phaya
phambili – kodwa iibhola zakhe bezichithwa nguMorgan Gould noClaytin Daniels
abadlale ngokuzimisela zisuka kulo mdlalo. UGrobler ufake igowuli leSuperSport
ngomzuzu wamashumi amathathu emva komsebenzi omhle owenziwe nguGrant Kekana,
uThuso Phala noRenielwe Letsholonyane kumdlalo wePirates. URonwen Williams
ucike ibhola kaWome yathula cwaka kumzuzu wamashumi amathathu anethoba. Kuyiwe
kwixesha lokuphumla iPirates iphantsi koxinizelelo emva kokufakwa kwegowuli
yiSuperSport United. Amakhwenkwe kaStuart Baxter ayikrobele iBucs ukuba
ayizinzanga kakuhle emva, – uThabo Mnyamane, uJeremy Brockie noPhala bazamisle
ukulisebenzisa elo thuba. Yona iPirates ayikwazanga ukuwasebenzisa awayo
amathuba. Emva kwebhola engachithwanga kakuhle nguThabo Matlaba ekhokelele
kwigowuli – eZimnyama zitsale nzima ukuya ekupheleni kwesigaba sokuqala.

Emva kokuziwisa
kukaPhala phakathi kumhlaba kanozinti nangona ebephazanyisiwe nguHappy Jele,
usompempe uyikhombe echaphazeni ibhola. USiyabonga Mpontshane uyihlangule
iPirates ngokucika ipenela ebikhatywe nguBrockie. UKjell Jonevret ukhuphe
uGabuza waze wafaka uBernard Morrison – injongo ibikukukhangela indlela
yokudiliza udonga obeluqine ngqi lweSuperSport. Ngomzuzu
wamashumi amathandathu, uBrockie ufake igowuli lesibini kulo mdlalo. Uphinde
wafaka igowuli lesibini uGrobler emva kokunikelwa ibhola entle nguPhala – obegabadula okwehashe lomdyarho – ekunxele kulo mdlalo. Nangona Amabhakabhaka
ezamile ukuhlasela ngamaxesha athile kulo mdlalo – kodwa iibhola zawo
bezingenalo ulwamvila. UKingston Nkatha ungene endaweni kaGrobler emva
kokwenzakalisa uJele no-Abbubaker Mobara abebedlala emva. UNkatha ufake igowuli
emzuzwini omye engene. IPirates ifumene igowuli lokubika ngepenela efakwe ngu-Oupa Manyisa kumzuzu wokugqibela.

SuperSport United: Williams, Kekana, Gould, Daniels, Modiba, Phala, Furman, Letsholonyane, Mnyamane, Grobler, Brockie.

Orlando Pirates

: Mpontshane, Mobara, Jele, Matlaba, Phungwayo, Sarr, Manyisa, Rakhale, Makola, Wome, Gabuza.