Umdlalo obuphakathi kweMaritzburg United neChippa United uphele ebambene ngo’1-1 la maqela mabini kumdlalo we-Absa Premier Soccer league obubanjelwe eHarry Gwala Stadium kubusuku banamhlanje.

IiChilli Boys zintingele eMgungundlovu zingafumananga nenye impumelelo kwimidlalo emithandathu edlulileyo ilandelelana. Lo nto yenziwa kukubabuthuntu kweefolosi zayo. Nakulo umdlalo wanamhlanje, iThe Team of Choice, ingcangcazelise umnatha kuqala emva kwempazamo eyenziwe ngabadlali basemva nonozinti weChippa, uDaniel Akpeyi.

Eli qela lizinze eBhayi lifumene ithuba imizuzu ilishumi elinesihlanu umdlalo uqalile – kodwa uKatlego Mashego akakwazanga ukulisebenzisa elo thuba. Nayo iMaritzburg United iwafumene awayo amathuba engawasebenzisanga – kuyiwe kwikhefu esabambe ngeqanga la maqela.

Kwisiqingatha sesibini, uDeolin Mekoa, ufake igowuli lokuqala le Maritzburg United kulo mdlalo emva kwemizuzu emihlanu qha. Kuye kwanyanzeleka nazo iiChilli Boys zixoze mphini wumbi.

UThembinkosi Lorch ufake igowuli lokulinganisa ngomzuzu wamashumi asixhenxe emva kwebhola egotywe nguMac Van Heerden.

Ngoku eli qela liqeqeshwa nguDan Malesela lizakujamelana neKaizer Chiefs kumdlalo wePSL, eBhayi, ngoMgqibelo.

Komnye umdlalo Amakhosi abambene neCape Town City ngo’1-1 kumdlalo wePSL obubanjelwe eFNB Stadium. Nangona iKaizer Chiefs iwuqale kakuhle lo mdlalo – kodwa kwakuphuma uSibusiso Khumalo, onikwe ikhadi elibomvu, yabuya ngamandla iCape Town City.

Amathuba wokuphumelela umdlalo macala omabini ebekhona. Kanti iBidvest Wits ebingekabwethwa kule sizini ibethwe yiSuperSport United ngo’2-0 namhlanje kumdlalo obubanjelwe eMbombela Stadium.

Oku kwenzeka emva kokuba amakhwenkwe kaStuart Baxter ebethe i-Orlando Pirates ngo’1-0 kwiTelkom Knockout kwimpelaveki edlulileyo.