Kubuyiswa iCape Town Spurs emva kweminyaka

Emva kokuba
iAjax Amsterdam igqibe kwelokuba ithengise izabelo zayo (51%) kwiCape Town
Stars, ebinezabelo ezimbalwa (49%), ngoku iAjax Cape Town iza kutshintshwa
igama ibe yiCape Town Spurs. Iqela laseDutch libuchithile ubuhlobo balo
noMzantsi Afrika izolo umhla wamashumi amathathu kwinyanga yoMsintsi ku-2020.
Ukusungulwa kwe-Ajax Cape
Town kwalandela ukudityaniswa kwamaqela ebhola ekhatywayo amabini
aziwayo, iCape Town Spurs neSeven Stars, awayephantsi kukaJohn Comitis noRob Moore ngo-1999 emva kokufumana inkxaso kwiAjax Amsterdam. Kunyaka
ophelileyo, iAjax iye yathotyiselwa kwiGladAfrica Championship emva kokugwetywa
yiPSL ngenxa yokudlalisa uTendai Ndoro engafanelekanga. Kuthe kwakubonakala
okokuba ayikwazi ukunyukela kwiDStv Premiership kwinyanga ephelileyo, umtshato
uye awaqina namaDatshi. Ngoku abaphathi be-Ajax Cape
Town bafake icelo lokutshintsha igama kwiPremier Soccer League ekulindeleke
siphunyezwe phambi kokuqala kwesizini ka-2020/21.

Kulindeleke
kubekho iinguqu ezibonakalayo emva kwentlanganiso yabaphathi nabalandeli izolo
ebizelwe ukutyhila indlela eya phambili. Ukubuyiswa kweCape Town Spurs ngeke
kube yingxaki ngoba yayiliqela elikhulu eMzantsi Afrika elavelisa abadlali
abaziwayo kwihlabathi abafana noShaun Bartlett
no-Andre Arendse abadlalela amaqela aseYurophu ebutsheni babo. Emva kokuwa
kweenzame ze-Ajax zokunyukela phezulu, kukho iingxelo ezithi uMnu. Ari
Efstathiou ufuna ukuthenga iqela elidlala kwiPSL. Amaqela afana neBloemfontein
Celtic neSuperSport United abalwa phakathi kwamaqela athethe ngawo. “Usihlalo
we-Ajax, uAri Efstathious, ukhangela iqela kwiPSL. Ukhathazeke kakhulu emva
kokunganyuki kwe-Ajax ngoba ininzi imali ayigalelel kuyo kwisizini
egqithileyo,” utshilo ohlebele u-IOL Sport ekuqaleni kwale veki. Abaphathi
be-Ajax Amsterdam
bathe bayemka eMzantsi Afrika ngoba awusavelisi abadlali abasemgangathweni
ophezulu.