UClinton Larsen ubaqhwabela izandla abadlali bakhe

Ugoduke encume
olukabhulankethe uClinton Larsen obaqhwabele izandla abadlali bakhe emva komsebenzi
omhle abawenze emdlalweni. IChippa United ibambene ngegowuli elinye macala (1-10)
neMamelodi Sundowns emdlalweni we-Absa Premiership edlale ngamathuba kuwo eNelson
Mandela Bay Stadium izolo ebusuku. Igowuli leSundowns lifakwe nguLebohang Maboe
emzuzwini wamashumi amathathu anesihlanu kwisigaba sokuqala. Kanti elayo
iChippa United lingene emzizwini wamashumi alithoba emva kwempazamo eyenziwe
nguMotjeka Madisha obezama ukuchitha ibhola ebikhatywe nguMeshack Maphangule. Emva
kokulawula umdlalo, iSundowns yoyiswe kukusonga umdlalo, abadlali abafana
noSibusiso Vilakazi boyiswe kukufaka ibhola emnatheni. Izinto ziguqukile
kwisigaba sesibini somdlalo emva kokuba idlale umdlalo ongcono.

Indlela edlale
ngayo iChippa United neSundowns kulindeleke okokuba ifunqule ukuzithemba
kwabadlali phambi kokudibana neGolden Arrows emdlalweni olandelayo kwiveki
ezayo. “Ndoneliseke kakhulu yindlela iqela elidlale ngayo. Ndicinga ukuba
lithathe apho beliyeke khona kwisizini egqithileyo. Nangona iqela belihamba
emva ngegowuli elinye – kodwa abadlali khange banikezele kwade kwasekugqibeleni.
Yinto ebalulekileyo kakhulu kuthi leyo kweli qela. Ndizingomba isifuba ngomsebenzi
owenziwe ngabadlali. Balifanele lonke uzuko emva kokudlala kakuhle. Thina
sibanike nje indlela yokuqubisana neSundowns, okunye kuye kwenziwa ngabo
abadlali. Ikwazile ukusongamela iDowns kwiindawo ezithile – kodwa ndicinga
ukuba abadlali bakwazile ukumelana nayo,” utshilo uLarsen emva komdlalo.

Amawele
akwaMoyo asuka eZimbabwe abe neyona mini yakhe nzima kodwa ancedwe nguKapteni,
uFrederic Nsambiyumva, umdlali okuphela kwakhe obedlala kwabasemva nakwisizini
egqithileyo. Ikwazile iSundowns ukudala amathuba acacileyo emdlalweni – kodwa uLarsen
ucinga ukuba abadlali bakhe benze umsebenzi ophucukileyo kakhulu. “Besilindele
umdlalo onzima kakade xa sidlala neqela elifana neMamelodi Sundowns. Badlale
kakuhle phaya emva abadlali bethu ngoba besufuna iSundowns idlalele kude kuthi.
Ibhola yeSundowns yokuqala eye ezipalini yile iyifakileyo emzuzwini wamashumi
amathathu anesihlanu. Ukubamba iSundowns ixesha elide kangakaya emdlalweni
kuthetha ukuthi indlela esidlala ngayo phaya emva intle kakhulu. Into nje
endiphoxileyo emdlalweni wethu ibe kukuphuncula ibhola – kodwa singakwazi
ukukhawuleza siyifumane. Iqela lethu lidlale umdlalo ongcono kakhulu kwisigaba
sesibini somdlalo. Yinto entle ukufumana inqaku sidlala neentshatsheli,” uvale
ngaloo mazwi uLarsen.