Umqeqeshi weSpringbok, uJacques Nienaber, uthi ubathembile abadlali abachongileyo phambi komdlalo omkhulu ongoMgqibelo. AmaBhokobhoko aza kuswantsulisana namaNgesi (British & Irish Lions) emdlalweni wovavanyo wokuqala eCape Town Stadium ngentsimbi yesihlanu emalanga. Okwenza umqeqeshi weSpringbok azithembe phambi komdlalo obaluleke njengalo wangoMgqibelo kukuba abadlali bakhe badlale ngendlela encumisayo emidlalweni emithathu yamalunguselelo. UMzantsi Afrika wavuthulula iGeorgia phambi kokuphazanyiswa yiKhorona, walandelisa ngeBritish and Irish Lions emdlalweni wokucweya phambi kowokugqibela obethwe kuwo yiVodacom Bulls. Abadlali abaquka uSiya Kolisi, uMakazole Mapimpi no-Ox Nche baphuncukile kwiKhorona kwaye baqukiwe kwiqela eliza kujongana neqela laseYurophu.
Ethetha ngoKolisi obengathi angaphoswa ngumdlalo wokuqala, uNienaber uthethe wenjenje: “UKolisi nguKapteni wethu futhi ngoyena mntu oyaziyo indlela esifuna ukudlala ngayo.” AmaBhokobhoko aphantsi koxinizelelo ngoba zange akwazi ukudlala umbhoxo ukusukela oko abuya nendebe yehlabathi eJapan ngonyaka ka-2019 ngenxa yeKhorona. Ngoku kufuneka abonise amazwe aziintshaba zawo afana neNew Zealand, iAustralia neNgilane ukuba aseziingangalala zombhoxo wehlabathi. Indlela abakhethe ngayo abadlali bakhe uNienaber ihambelana ncamashi neenjongo zakhe zokuphumelela umdlalo ngempelaveki.
“Phantse zonke iziqwayi zabadlali abaphumelela itumente yehlabathi bakhona. Imidlalo yokucweya esiyidlale neGorgia, iBritish & Irish Lions neVodacom Bulls isinike ithuba lokudibanisa abadlali abambalwa abagqibela ukudlala kunye kwitumente yehlabathi. Sikhethe abadlali esinabo siyazi into abanokuyenza ebaleni. Ngeke kubelula ukuqubisana neefolosi zamaNgesi – kodwa kubalulekile ukuba aluve ulwamvila lwethu ebaleni ngomhla womdlalo. Siwenzile amalungiselelo, okuseleyo kukudlalo nggendlela esiceangcise ngayo ebaleni qha,” utshilo uNienaber emva kokubhengeza abadlali abaza kuqala umdlalo ngentsimbi yesihlanu emalanga.
Iphele njalo indlela yeSundowns kwiCAF Champions League!