“Elona xesha lokudlala nePirates leli,” utshilo uClinton Larsen emva komdlalo obuseBhayi.
Umqeqeshi weChippa United ukuthethe oku phambi komdlalo weqela lakhe neOrlando Pirates oza kube useOrlando Stadium kwiveki ezayo.
ULarsen unethemba lokuba iChippa United ikwazi ukothusa umzi ngokuthi ibethe iPirates ethiwe mbende yingxaki yokungaqhubi kakuhle emidlalweni kule sizini.
Ezimnyama sezidlale imidlalo emithandathu yonke ezingaphumelelanga namnye kuyo. Okwenze izinto zambi ngakumbi kukukhutshwa kwePirates kwiMTN 8 nakwiCaf Champions League zisuka nje.
URhulani Mokwena, ongene ezihlangwini zikaMilutin Sredojevic, uphantsi koxinizelelo kwaye unethemba lokuba iqela lakhe lingafumana iziphumo ezincumisayo xa lidlala neChippa United. Naye kwelakhe icala umqeqeshi weChippa uncwase ukufumana amanqaku apheleleyo okokuqala kule isizini emva kokuba iqela lakhe lidlale ntanganye emidlalweni emithathu labethwa komnye.
Kwiveki ephelileyo, iChippa United ibambene ngeqanda macala nePolokwane City emdlalweni obuseNelson Mandela Bay Stadium.
Nangona iqela lakhe uLarsen lingakwazanga ukuphumelela umdlalo linawo amathuba – kodwa ubancomile abadlali bakhe. Ngoku unethemba lokongeza iingxaki zePirates emdlalweni ozayo.
“Sizimisele ukuya kwiPirates sibenze nzima ngakumbi ubomi bayo. Ndicinga ukuzithemba kwabadlali bayo kwehlile. Kodwa kufuneka sihlabe sikhangele ngoba amaqela amakhulu ayakwazi ukuzijika izinto nanini na. Umdlalo wona uza kuba nzima ngoba iPirates liqela elisemgangathweni ophezulu. Ewe, ayikwazanga ukufumana amanqaku apheleleyo emdlalweni ewudlale neGolden Arrows. Ukuba iifolosi nabadlali bethu basesiswini bangadlala kakuhle – singayenzela iingxaki iPirates,” utshilo uLarsen kutshanje.
Umdlalo wala maqela mabini uza kudlalwa kwiveki ezayo kuba iPirates iye yakhutshwa kwiCaf Champions kwangoko.
ULarsen uya emdlalweni oseGoli enethemba lokuba abadlali abafana noDiamond Thopola baya kube bephilile.
Meta AI, wamkelekile kwikhaya lethu lesiXhosa!