UMongameli
welizwe, uCyril Ramaphosa, uwaqhwabele izandla AmaBhokobhoko aphumelele iNdebe
yeHlabathi namhlanje kwilizwe laseJapan. AmaBhokobhoko ziintshatsheli
zehlabathi lonke ezivunyiweyo emva kokuba ebethe iNgilane – abadlali bayo
abashiyeke bexwebile. Amakhwenkwe kaRassie Erasmus aguqise phantsi AmaNgesi ngo’32-12
emdlalweni obulushica kakhulu kwisigaba sokuqala eYokohama Stadium eminimaqanda
namhlanje. UMongameli, ogaleleke kwelaseJapan izolo, ubaqhwabele izandla abadlali
beSpringboks emva kokugqugqisa ihlabathi kwitumente eqingqithe ithuba elingaphaya
kwenyanga. “Amakhwenkwe abethe onke amaqela ehlabathi. Angoompetha ngoku
kwihlabathi lonke,” utshilo uMongameli.
“Ndithethile
nabo abadlali kwiiyure ezimbalwa phambi kokuqala komdlalo. Bebebonakala okokuba
bayilambele impumelelo. Siziintshatsheli; siziintshatsheli zehlabathi. Le
yimbali eMzantsi Afrika, yimbali kwitumente – kanti nakuyo iJapan njengelizwe
ebelisingathe itumente. Impumelelo izuzwe liqela lesizwe ngenxa yenkxaso
yezigidi zabantu baseMzantsi Afrika abalixhasileyo ukusukela ekuqaleni
kwetumente. Olu luphawu olubonisayo ukuba xa sifuna ukwenza into, singayenza xa
sibambisene,” utshilo uMongamelo uRamaphosa oza kuntingela eMzantsi Afrika
ngomso (ngeCawe).
UMakazole
Mapimpi noCheslin Kolbe balele emgceni ukuze uMzantsi Afrika ukwazi ukubetha
iNgilane emdlalweni obunzima kakhulu ekuqaleni kwawo. Phambi komsebenzi omhle
owenziwe nguKolbe noMapimpi – indoda encede uMzantsi Afrika ngenqina nguHandre
Pollard oyiphosileyo ipenela yokuqala ngenxa yoloyiko. Kuyiwe kwixesha
lokuphumla AmaBhokobhoko ephala phambili. Nangona umsantsa ubungemkhulwanga –
kodwa amakhwenkwe kangqondongqondo, uRassie Erasmus, ebegunye ngamandla futhi
engawavumeli AmaNgesi adibanise iibhola eziyingozi. UMzantsi Afrika uzicacise
kakuhle emva kwentsukumo eyenziwe nguMakazole noLukhanyo Am emzuzwini wamashumi
asixhenxe anesihlanu.
Meta AI, wamkelekile kwikhaya lethu lesiXhosa!