UPeterson uncede Amakhosi atsho aphumelela iCarling Black Label Cup

Emva kwamashumi alithoba emizuzu emdlalweni, khange kubekho qela elikwazileyo ukufumana igowuli lokuphumelela nangona amathuba ebekhona. Amakhosi aye aphumelele ngo’4-3 kumapenela emva komsebenzi omhle owenziwe nguBrandon Peterson ocike amapenela amabini. Noxa kusekutsha – kodwa amaqela azamile ukunika abalandeli umdlalo omhle ebaleni. Okwakuxolisa abaqeqeshi bobabini kukuba abadlali bebezimisele emdlalweni noxa bebengekho abalandeli ebaleni ngenxa yeKhorona enyanzelise ukuhlehliswa komdlalo weCarling Black Label kunyaka ophelileyo. Unozinti weKaizer Chiefs, u-Itumeleng Khune, ube ngunobangela wokungaphumeleli kwe-Orlando Pirates emdlalweni obuse-Orlando Stadium ngokuhlwa kwanamhlanje – kanti naye uRichard Ofori usebenzile. UPeterson uzenzele igama ngokunceda iChiefs namhlanje.

Ebekhona amathuba – kodwa iChiefs iphose ithuba lokuphumelela umdlalo. URichard Ofori uvale ipenela ebikhatywe nguCardoso kwisigaba sesibini. Amaqela omabini aye kwixesha lokuphumla kungekho elikwazileyo ukubhalisa ebhodini. Isiqingatha sokuqala besisihle – kodwa bekungekho mathuba amaninzi ngoba amaqela ebedlala elumkile. Amakhosi akwazile ukulawula umdlalo ekuqaleni komdlalo esebenzisa abadlali abaselula abaquka uRadebe, uMashiane noBlom esiswini. Ekuhambeni kwexesha, umdlalo wePirates uye waqina. ULorch, uHotto noMakaringe bawufunqule umdlalo weBucs yatsho yakwazi ukungena emhlabeni kaKhune. Ekuzeni kuphela kwesigaba sokuqala, uLorch ukhabe imbumbulu yebhola evalwe nguKhune. Akukho nto ingako ekhethekileyo ekunothethwa ngayo eyenzekileyo – kodwa abadlali bebebonakala ukuba basaqhanile ngenxa yekhefu elide abasuka kulo.

Noxa naso isiqalo sesiqingatha sesibini besingataki iintlantsi – kodwa iChiefs iphantse yenza idemesha ngebhola ebikhatywe nguSekgota ongene kwisigaba sesibini. Nakwelayo icala iPirates izamile ukuhlasela ngebhola ekhatywe nguJooste ehambe ngaphezulu kweepali. USebenzi uNyauza ngethuba echitha ibhola kaCole Alexander obefumene ibhola esuka kuBilliat emhlabeni ka-Ofori. Emva koko, uMhango uthintelwe nguKhune ekhabe ibhola entle ebeyinikelwe nguHotto. Emzuzwini wamashumi asixhenxe, uRichard Ofori ucike ipenela ebikhatywe nguCardoso. Emva koko, umdlalo uye watshintsha. Ukuzithemba kubadlali bePirates kuye kwafunquka kakhulu – kodwa side saphela isiqingatha sesibini kungekho gowuli emdlalweni.