Uqhwatyelwe izandla uStephen Mokoka owenze imbali eGqeberha!

Isidima selizwe loMzantsi Afrika sifunqukile kwicandelo lezeembaleki emva kokuva uStephen Mokoka enze iziqwenga emdyarhweni weembaleki obubanjelwe eGqeberha. UMokoka, 37, wenze imbali kwimpelaveki egqithileyo ngethuba ephumelela iNedbank Ultra Marathon engumgama ongamashumi amahlanu eekhilomitha (50km) ngexesha eliziiyure ezimbini, amashumi amane emizuzu nemizuzwana elishumi elinesithathu (2:40:13). Ngokwenza njalo, uMokoka wophule irekhodi lehlabathi elenziwa yimbaleki yaseTopiya (Ethiopia) egama linguKketema Negasa eyabaleka umgama ongamashumi amahlanu ngeeyure ezimbini ezinamashumi amane anesibini emizuzu nemizuzwana esixhenxe (2:42:07).

Umsebenzi omkhulu owenziwe yile mbaleki yemigama emide yaseMahikeng, kwiphondo laseMntla Ntshona, uvunyuwe ngumbutho olawula ezembaleki, iWorld Athletics, wagqwatyelwa ngabantu abaninzi. Kusoloko kutshila iimbaleki zamanye amazwe kwimidyarho yeembaleki ebanjelwa eMzantsi Afrika. Yiyo le nto ukuphumelela kukaMokoka kwenze kwancasa kakhulu ebantwini belizwe lakhe. “Ndidinwe,” utshilo uMokoka emva kokuphuma entanjeni. Ngokokutsho kwakhe uMokoka, yena ebengacinganga ukuba angayiphumelela iNedbank Marathon. Uye eGqeberha ezilungiselele njengakweminye imidyarho yeembaleki aqhele ukuya kuyo.

Ukwamkele kodwa ukuphumelela kwakhe nangona ethe iya kuthatha ixesha ukuze ingene engqondweni yakhe into yokuba nguye intshatsheli eyenze imbali. “Indlela ibinde kakhulu. Andazi nokuba ndiza kuziva njani emva kwalo mdyarho – kodwa bendiwonwabele. Phambi komdyarho, kukho iindlela entsha esiyizamileyo nomqeqeshi wam. Besifuna ukuvavanya yona kuba sifuna ukubona ukuba iza kusebenza na. Ndiyathemba ukuba indlela endibaleke ngayo ayindigqibanga amandla ngoba ndifuna ukuya kwiWorld Championship,” utshilo okaMokoka. Umongameli we-Athletics South Africa, uMnu. uJames Moloi, uvuyisene noMokoka emva kokwenza umsebenzi omhle. “Kusivuyise kakhulu ukubona iimbaleki zethu ziqhuba kakuhle ekhaya. Emva kokuphazanyiswa yiKhorona, ngoku sizama ukuza nemidyarho emininzi,” utshilo uMoloi.