Amazwe elizwekazi le-Afrika azakudibana kweyona tumente inkulu yebhola ekhatywayo ukusukela ngomhla weshumi elinesine kule yoMqungu ukuya kumhla wesihlanu kwinyanga ezayo.
Le tumente isingathwa rhoqo kwisithuba seminyaka emibini izakube iseGabon – apho kulindeleke i-Ivory Coast izame ukukhusela indebe ye-Afrika eyiphumelele ngo’2015, e-Equitorial Guinea.
Imidlalo yalo nyaka izakuthanda ukuba nzima xa ubani eqwalasela indlela athelekiswe ngayo amaqela. Amehlo azakube ethe ntsho kuGroup C one-Ivory Coast, DR Congo, Morocco neTogo. Kule tumente, i-Ivory Coast, lelona lizwe linethuba lokuphumelela ngenxa yabadlali balo abanamandla abaquka uYaya Toure, uSerge Aurier nefolosi uWilfred Bony.
Ngokuqinisekileyo abadlali abafana noToure bafuna ukuyigcina le ndebe bazakuswantsulisana neGabon edlalela ekhaya. IGabon lilizwe elidlala kakuhle nangona ingade ifikelele kwimidlalo yokugqibela.
Kule tumente izakuthembela kumdlali wayo oyingozi – uPierre-Emerick Aubameyang – odlalela iBorussia Dortmund yaseJamani. Uza kule tumente namava futhi efuna ukuzenzela igama njengomdlali oveleleyo kwi-Afrika iphela. KuGroup D, yiGhana neMali ezingenza ezibukwayo. Iqela laseJiphethe (Egypt) kunzima ukuyibona eyona nto elingayenza emva kokuphazamiseka kwebhola yela lizwe kule minyaka idlulileyo.
Kodwa kungayimpazamo ukucinga ukuba ayinalo ithuba lokudlala kakuhle kule tumente.
Amazantsi e-Afrika azakumelwa yiZimbabwe eqhayisa ngabadlali abafana noWillard Katsande, uKhama Billiat noKnowledge Musona. Ithelekiswe neTunisia, Algeria neSenegal. Inalo ithuba lokudlulela kumjikelo olandelayo ukuba iyibambile indlela edlale ngayo phambi kwale tumente. Abadlali abafana noBilliat bazakusebenzisa le tumente ukuze bazithengise kumaqela aphesheya.
Group A: Gabon, Burkina Faso, Cameroon, Guinea-Bissau.
Group B: Algeria, Tunia, Senegal, Zimbabwe.
Group C: Ivory Coast, DR Congo, Morocco, Togo.
Group D: Ghana, Mali, Egypt, Uganda.
Iphele njalo indlela yeSundowns kwiCAF Champions League!