Kuthe tshitshilili ulonwabo lodwa eMgungundlovu!

Ngale ntlwa
kuthe tshitshilili ulonwabo lodwa eMgungundlovu emva kokuba iMaritzburg United
ifumene ithuba lokuqala lokudlala kumdlalo wamagqibela-kankqoyi kwisithuba
seminyaka elishumi elinesihlanu idlala kwinqanaba eliphuzulu kwibhola
yaseMzantsi Afrika. IMaritzburg icambalalise iMamelodi Sundowns ngo’3-1
kumdlalo weNedbank Cup obutshisa ngeyona ndlela eHarry Gwala Stadium. Ngoku
iTeam of Choice iza kungquzulana neFree State Stars ezingombele iKaizer Chiefs
no’2-0 kumdlalo obubanjelwe eMoses Mabhida Stadium, eThekwini, izolo ebusuku. UGaston
Sirino ubhalise ebhodini kumzuzu wokuqala umdlalo uqalile ngalo ndlela ubeke
iSundowns endaweni entle.

Kuyiwe kwixesha
lokuphumla Amasandawana enkqenkqeza phambili ngegowuli elinye eqandeni. UPercy Tau,
uSirino noSibusiso Vilakazi bebeyinto ibila kubadlali basemva beMaritzburg
basemva – kodwa bakwazile ukuxhathisa. ULebohang Maboe ufake igowuli
leMaritzburg lokulinganisa kwisigaba sesibini somdlalo. Emva koko abadlali
baFadlu Davids bawufunqule umdlalo wabo kucaca ukuba bazimisele ukuyishicilela
iDowns. Izinto ziqale ukuyihambela kakubi emdlalweni iDowns ngethuba kukhutshwa
uSirino ngekhadi elibomvu. Amandla weSundowns aye ehla kwaye abadlali beTeam of
Choice ababalekayo bayiqweqwedise yade yavula iDowns emva.

UMxolisi
Kunene, ongene kwisigaba sesibini, uvalele emnatheni igowuli lesibini. Elesithathu
lifakwe nguFortune Makaringe – kwatsho kwagqitywa ngeSundowns ebekucingeleka
ukuba yiyo eyakuya kumdlalo wokugqibela weNedbank Cup ozakube useKapa kwinyanga
ezayo. UPitso Mosimane ufake abadlali abafana noBrockie noMakgalwa – kodwa bafike
sekonakele kakhulu.

Maritzburg United: Ofori, De Reuck, Fransman, Xulu, 3
Sanoka, Makaringe, Maboe, 28 Mekoa (Kunene
71’), 26 Shandu, Ndlovu (Thlone 95’), Fileccia (Mokate 89’).

Amalalela: Mpandle, Mokate,
Matima, Kunene, Atouba, Van Wyk, Thlone.

Mamelodi Sundowns: Onyango, Langerman, Arendse,
Nascimento, Ngcongca (Morena 55’), Sirino, Mabunda, Manyisa, Zwane, Vilakazi
(Makgalwa 82’), Tau ( Brockie 89’).

Amalalela: Brimah, Madisha,
Morena, Zulu, Brockie, Laffor, Makgalwa.