“Zange ndayibona into enje, kudalala ndilijikeleza ihlabathi!”

Umqeqeshi we-Orlando
Pirates upopene, akayazi eyona nto makayenze – ngenxa yabadlali bakhe
abangama-athalala phambi kweepali. Emva komdlalo we-Absa Premier Soccer League obuphakathi
kwePirates neGolden Arrows ophelenga ntanganye ngo’0-0, uMilutin “Micho”
Sredojevic uthe ukuphosa kwabadlali amathuba emidlalweni yeyona nto imbi
angazange wayibona kwamanye amazwe aqeqeshe kuwo ngaphambili. USredojevic, 48,
uneminyaka engaphaya kwamashumi amabini engumqeqeshi kwinqanaba eliphezulu kwibhola
ekhatywayo kumazwe afana noMzantsi Afrika, Uganda, Ethiopia, Tanzania, Sudan,
Rwanda neSerbia – ilizwe awazalelwa kulo nawaqala kulo ukuqeqesha.

Le ndedeba
igaleleke eMzantsi Afrika embindini wonyaka isuka e-Uganda; injongo
ibikukunceda nokuguqula imeko yeBucs esokoleyo kwisizini yePSL ka-2016/17 –
kodwa umsebenzi wakhe awululanga ngenxa yabadlali abangaziboniyo iipali. “Ndizama
ukubethelela umkhwa wokufaka amagowuli ebadlalini ngokuthi bangazikhathazi ngamathuba
abawaphosileyo xa ebesebaleni. Le yingxaki ebonakalayo jikelele elizweni.
Bendifanelwe kukuphuma izimvi ngenxa yoxinizelelo – kodwa andinguye umntu
onikezelayo,” utshilo uSredojevic emva kokubambana kweqela lakhe naBafana Bes’thende
ngoLwesibini.

USredojevic
uyahlonitshwa ebholeni ngoba uthathwa njengomnye wabaqeqeshi
abangoongqondo-ngqondo. Ukuzothi ga ngathi uzamile ukusitshintsha isimo seqela –
kodwa eyona nto isilelayo ngoku yile yamagowuli ngoba indlela iqela elidlala
ngayo ibhetele kakhulu kunaleyo yesizini egqithileyo. “Ingxaki ekhoyo apha yile
yabadlali abazikhathaza kakhulu xa bephose amathuba. Siyazama ukuncedisana nabo
ngoba asifuni lo nto ihlale ezingqondweni zabo. EMzantsi Afrika iyadlalwa
ibhola. Ingxaki ilapha engqondweni qha. Zange ndayibona into nje, kudala
ndijiekeleza ihlabathi,” utshilo uMicho.

Emalanga
ngeCawe, iPirates indwendwela iBloemfontein Celtic. Eyona nto enika umdlalo
ngalo mdlalo kakhulu kukuba kuzakube kudibene abaqeqeshi abazanayo –
uSredojevic noVeselin Jelusic owenza izinto ezibonakalayo kwiCeltic esinde
ngolambisa ekuthotyisweleni kwisizini edlulileyo.