Emva kweeveki kuphikiswana ngelona qela elizakumela iMpuma Koloni kwimidlalo kazwelonke kwi-ABC Motsepe League yokuhluzwa kwamaqela, kude kwacaca ukuba yi-EC Bees iqela eliphumelelayo.
Ekuqaleni bekuthiwe yiFuture Tigers ezakudlala kule tumente yamaqela alwela ukuya kwaNational First Division emva kokuthathelwa kweBees, eyabamba indawo yesithathu kwiMotsepe eMpuma Koloni, amanqaku amathathu ngenxa yesityholo sokudlalisa umdlalo ongabhaliswanga kakuhle.
Emva kokubhena, iBees ziphumelele, ngoku izakwamkela amaqela asuka kuzwelonke kule midlalo ezakudlalela eBuffalo City Stadium, eSisa Dukashe naseJan Smuts Stadium ukusuka ngomhla wesihlanu ukuya ngomhla weshumi elinanye kule nyanga yeSilimela.
Amaqela ekulindeleke athath’ inxaxheba kule tumente yi-EC Bees (E. Cape), Super Eagles (Free State), Uthongathi (KZN), The Dolphins (Limpopo), Acornbush, Mainstay United (N. Cape), Buya Msuthu (N. West, Zizwe United (W. Cape) nelinye laseGauteng elingekachazwa.
Mabini amaqela azakufumana ithuba lokudlala kwinqanaba elingasentla.
Iqela eliphumeleleyo lakufumana isigidi seerandi.
“Siwanqwenelela amathamsanqa onke amaqela azakuthatha inxaxheba kule tumente,” utshilo uDanny Jordan.
pedro.mapelo@inl.co.za
[BUKELA] I-SASSA inqumamise abasebenzi ababini ngokusebenzisa umuthi eofisini