UVevu urhalela ifumane indebe iChiefs!

I’solezwe lesiXhosa lincokole nomlandeli weKaizer Chiefs onqwenela ukubona izinto zitshintsha kwiqela lakhe.

Pedro Mapelo: Khawusixelele ngawe Mhlekazi, ungubani?

Umlandeli: Igama lam ndingu-Abongile Vevu, ndizalelwe kwidolophi yaseLusikisiki. Ndingumlandeli omkhulu weKaizer Chiefs.

PM: Sicela usixelele ukuba kutheni wena wakhetha ukuthanda iChiefs?

Abongile Vevu: Phaya kwiminyaka eyadlulayo, kwakukho umdlali owayeyidlala ngobukhulu ubukrelekrele ibhola ekhatywayo. Igama lakhe yayinguThabo Mooki. Omnye umdlali yayinguPatric Mayo. Abo ngabanye babadlali abandenza ndayithanda iKaizer Chiefs. Enye into sisinxibo, imibala nabalandeli beqela eli ndibathanda kakhulu xa bevathe isinxibo sabo.

PM: Kwibhola yeli lizwe, sesiphi esona siganeko ongasoze usilibale?

AV: Uyabona xa kukho umdlalo ophakathi kweChiefs ne-Orlando Pirates – yeyona nto inkulu kum leyo. Phaya koo’2007/08, iChiefs yabetha iPirates komnye umdlalo ekwakutshatshele kuwo uKnowledge Musona. Omnye umdlalo endingasoze ndiwulibale ngulo iChiefs yabethwa kuwo yiMamelodi Sundowns. Soze ndiwulibale!

PM: Unqwenela ikwenzele ntoni iKaizer Chiefs kule isizini?

AV: Bendirhalela iphumelele indebe ye-Absa Premier Soccer League. Kodwa ingxaki ikhona apha kumqeqeshi. Wenza iinguqu ezininzi endingazithandiyo. Njengokuba singenaye umdlali ofaka amagowuli, bekungangcono ukuba singamfumana. Sixhomekeka kakhulu kubadlali basemva kwicala lokufaka amagowuli.

PM: Ngoobani abadlali obathandayo kwiChiefs, kuba kutheni?

AV: Ndithanda uSiphiwe Tshabalala noGeorge Maluleka. Abo badlali bayazimisela xa bedlala. Ngoku besidlala nePirates, uShabba wadlala umdlalo omhle kakhulu kwaye nangoku besidibene neBaroka FC, udlale kakuhle.