IWits iphumile kwiCaf Champions League

Izangxa zaseYiphutha, i-Al Ahly, zikhuphe ngomva iqela loMzantsi Afrika, iBidvest Wits, kwiCaf Champions League emva kokuba la maqela ethe adlala ntanganye ngeqanda macala [0-0] kumdlalo obubambene eBidvest Stadium ngale njikalanga. IClever Boys ziphuma kolu khuphiswano emva kokubethwa yi-Al Ahly ngo’1-0 kumdlalo wokuqala odlalelwe eYiphutha kwiveki ephelileyo. Amakhwenkwe kaGavin Hunt akakwazanga ukuwasebenzisa amathuba awafumeneyo kwiziqingatha zozibini zomdlalo – into akhale ngayo umqeqeshi emva komdlalo.

Iindwendwe zeWits zize kulo mdlalo zifuna into enye jwi: ukukhusela impumelelo yazo kwaye ziyenzile lo nto ngaphandle kokusokola. Eli qela lase-Egypt khange libonakalise kungxama nakubeni belibokanala likurhalela ukufumana igowuli xa lifumene ibhola. Ngelishwa yiWits ebiphantsi koxinizelelo ngoba ibihamba emva ngamagowuli. Kwisigaba sokuqala abadlali ethembele ngabo iWits, uPhakamani Mahlambi noGabadinho Mhango, bazamile ukuvula amathuba okufaka amagowuli kudonga lwe-Al Ahly – kodwa bafike ivale mba emva.

Kuyiwe kwixesha lokuphumla umqeqeshi weWits ezikrwemp’intloko kuba isokola ukufumana igowuli elinye ebelizakuyinika amandla ongezelelweyo kulo mdlalo. Kwesesibini isiqingatha somdlalo, i-Al Ahly ibithe chu emdlalweni – kodwa iye yaqinisekisa ukuba iyabagada bonke abadlali beWits abayingozi. Iphantse yafumana igowuli kwimizuzu yokugqibela emdlalweni emva kokugqwidiza kwabadlali beWits emva – kodwa ibhola inqandwe yipali. Ekugqibeleli i-Al Ahly igoduka incumile ngoba idlulela kumjikelo olandelayo weCaf Champions League eyibambe izihlandlo ezisibhozo – ngaphezulu kwawo onke amaqela kwizwekazi le-Afrika.

Ndumiso Mabena of Platinum Stars during the Absa Premiership 2016/17 match between Platinum Stars and Orlando Pirates at Royal Bafokeng Stadium, Rustenburg South Africa on 08 February 2017 ©Muzi Ntombela/BackpagePix

Kanti izolo ngokuhlwa, iPlatinum Stars, yenze umsebenzi omhle kakhulu ngethuba ibetha iVipers SC yase-Uganda ngo’3-1 kumdlalo weCaf Confederation Cup obubanjelwe eRoyal Bafokeng Stadium. Nangona iVipers SC yathi yakwazi ukuphumelela ngo’1-0 kumdlalo wokuqala obukwiveki ephelileyo e’Uganda – kodwa ngelishwa layo ayikwazanga kwade kwase kugqibeleni ukuyikhusela impumelelo yayo eRustenburg. Unozinti weDikwena, uMbongeni Mzimela, nguye ofake amagowuli amabini ngeepenela kulo mdlalo, laze elesithathu lafakwa nguNdumiso Mabena.