UPretty Msomi uza kukhokela iqela lesizwe lomnyazi kwindebe yehlabathi

Iqela
lesizwe lomnyazi (Netball), iProteas, limaxhapheshu ngamalungiselelo wendebe
yehlabathi. Umqeqeshi weProteas, uNorma Plummer, uqokelela abadlali
abaqaqambileyo abadlala ibhola yomnyazi (Netball) ngoba ukuqonda kakuhle
ukubaluleka kokudlala kwindebe yehlabathi. Isiqalo samalungiselelo kaPlummer
siqale ngokonyula kwakhe uPretty Msomi njengoKapteni weqela lesizwe. Kule veki,
umqeqeshi ubhengeze amagama wabadlali abalishumi elinambini abanoxanduva
lokuqinisekisa okokuba uMzantsi Afrika umelwa ngendlela efanelekileyo
emidlalweni yezizwe zehlabathi. Imidlalo yendebe yehlabathi iza kusingathelwa
kwindawo ekuthiwa yiM&S Bank Arena kwidolophi yaseLiverpool – eNgilane, kwisithuba
esingaphantsi kweenyanga ezimbini ukusukela ngoku.

“Ukulungela
kwabadlali indebe yehlabathi yeyona nto ebalulekileyo kum njengokuba isondela.
Ndike ndazipha ithuba lokufuthelana nabadlali abadlala apha eMzantsi Afrika
enkampini esePitoli. Abo ngabadlali endikwazileyo ukubajonga emidlalweni
yeTelkom Netball League esadlalwayo ePitoli,” utshilo uPlummer. Iqela lesizwe
lomnyazi liza kuntingela eYurophu emva kokuba uTelkom ebhengezwe njengomxhasi
omkhulu webhola yomnyazi kwiveki ephelileyo. Njengokuba bekukade kukho iBrutal
Fruit Netball Series, ngoku yiTelkom Netball League emva kokuba uSA Breweries egqibe
kwelokuba arhoxe njengomxhasi omkhulu webhola yomnyazi. Umongameli weNetball
SA, uCecilia Molokwane, uvakalise uchulumanco olukhulu emva kwenkxaso
ebhengezwe nguTelkom.

“Sonwabe
kakhulu singuNetball South
Africa. Eyona nto esivuyisayo kukuba inkxaso
kaTelkom iza kuwufunqula umdlalo womnyazi. Le nto siyifumeneyo iza notshintsho
ngoba ibandakanya onke amaqela adlala kwinqanaba eliphezulu. Kule minyaka
mihlanu siphethe iNetball League, baninzi kakhulu abadlali esibabonileyo
emabaleni wethu,” utshilo uMolokwane. “Kumnandi kakhulu kuthi ngoba kuza indebe
yehlabathi eMzantsi Afrika ngo-2023. sinethuba elide kwezemidlalo – kodwa asinawo
amava kwibhola yomnyazi,” utshilo uGugu Mthembu, isikhulu sakwaTelkom.

Amagama wabadlali:
Lenize Potgieter (GS), Ine-Marie Venter (GS), Maryka Holtzhausen (GA), Renske
Stoltz (GA), Erin Burger (C), Izette Griesel (C/WA), Khanyisa Chawane (C),
Bongiwe Pretty Msomi (WA, captain), Shadine van der Merwe (WD), Karla Pretorius
(GD), Phumza Maweni (GK), Zanele Vimbela (GK).