Iqela lesizwe
loMzantsi Afrika, iProteas, libokoboko amacala emva kokubethelwa oogqirha
nezicaka yiNgilane emdlalweni wokuqala wendebe yehlabathi yeqakamba namhlanje
emalanga. AmaNgesi avuthulule iProteas ngekhulu elinesine lonke lemitsi (104) emdlalweni
obubanjelwe kwibala ekuthiwa yiThe Oval kwisixeko esikhulu – iLondon. UMzantsi
Afrika uphumelele itosi – kodwa wakhetha ukunika iNgilane ithuba lokuqhokra
kuqala. Alibambe ngezandla zozibini elo thuba AmaNgesi atsho eqhokra amakhulu
amathathu aneshumi elinanye emitsi (311) yonke kuwe oothinti abasibhozo
phantsi. Nangona abadlali abagibiselayo beProteas bekwazile ukukhupha umdlali
kwangoko emdlalweni – kodwa basokole ukufumana oothinti ngexesha
elifanelekileyo baphinda abakwazi ukuyinqanda iNgilane ingaqabeli kumakhulu
amathathu emitsi.
Kuye
kwanyanzeleka okokuba abaqhokri boMzantsi Afrika banyamezele iibhola
ebetshawuza okwemibane yezulu ebezigityiselwa nguJofra Arche. Umdlali ophume
kwangoko emdlalweni ibe ngu-Aiden Markram emva kokubetha iibhola ezintle
ezimbalwa. Abadlali exhathise ngabo iProteas abafana noHashim Amla, uQuinton de
Kock, uFaf du Plessis noRassie van der Dussen baphume belandelela bengafikanga
nasekhulwini elinamashumi amahlanu emitsi – inani elibhetele amadoda asemsileni
ebenokuthatha lula kulo. UMzantsi Afrika ukhutshwe wonke unekhulu elinesixhenxe
lemitsi. Umqeqeshi, u-Ottis Gibson namakhwenkwe wakhe, baza kuzama ukuquma
ihlazo emdlalweni olandelayo xa bedibana neBangladesh emini ngeCawe – eThe Oval.
Nangona iqela lesizwe loMzantsi Afrika libethiwe emdlalweni wanamhlanje – kodwa
lisenalo ithuba lokulungisa izinto emidlalweni esibhozo elandelayo kwindebe
yehlabathi.
[BUKELA] I-SASSA inqumamise abasebenzi ababini ngokusebenzisa umuthi eofisini