AmaBhokobhoko anike uMongameli uCyril Ramaphosa itikiti lokuya emdlalweni wokugqibela eJapan

By
Pedro Mapelo
-
South Africa's Makazole Mapimpi (left) and Wales' Gareth Davies (right) battle for the ball during the 2019 Rugby World Cup Semi Final match at International Stadium Yokohama.

Ngamayeyeye
kuzo zonk’ iindawo eMzantsi Afrika eminimaqanda emva kokuba AmaBhokobhoko ethe
dyulukudu ngenkani emdlalweni weNdebe yeHlabathi wokugqibela. Iibhokwe
zikaRassie Erasmus zibethe ilizwe laseWales ngo’19-16 emdlalweni obulushica
ngeyona ndlela kwisixeko saseJapan ekuthiwa yiYokohama namhlanje. Ukuphumlela
koMzantsi Afrika kuthetha ukuthi uza kudibana etshatshalazeni neNgilane ebethe iNew
Zealand ayakholelwa emdlalweni obuyizolo. Emva
kokusokolisana kwisigaba sokuqala, kuyiwe kwixesha lokuphumla AmaBhokobhoko
ephala phambili ngamanqaku alithoba kwamathathu weWales. Indoda ekhulule
uMzantsi Afrika emdlalweni ngokulala emgceni ibe nguDamian de Allende encediswa
nguHandre Pollard ozibalule ngokukhaba amapenela.

Bekuke kwakubi
ngethuba uMzantsi ubambene neWales ngo’16-16 ixesha lomdlalo selithande
ukukekela. Ngokuphumelela kwawo AmaBhokobhoko, anike uMongameli woMzantsi
Afrika, uCyril Ramaphosa, itikiti lokuya emdlalweni wetumente yombhoxo wokugqibela.
Ekuseni izolo, uRamaphosa utsalele umnxeba uSiya Kolisi (uKapteni weBoks) efuna
ukumnika amazwi enkuthazo neqela lonke watsho ecela netikiti lokuya eJapan
ngokuthi mabaphumelele umdlalo wanamhlanje. Yenzekile lo nto, ngoku uRamaphosa
unethuba lokuphakamisa iNdebe yeHlabathi yombhoxo ngokufanayo nooMongameli
ababini: uGqirha Nelson Rholihlahla Mandela ngo-1995 noThabo Mbeki ngo-2007
ngokulandelelana.

 

 

RELATED ARTICLESMORE FROM AUTHOR