Amavarara athi afuna ukuyibetha iSuper Eagles ukuze aphakamise iChris Hani!

Kwimbali yawo
njengeqela lebhola ekhatywayo, Amavarara aza kudlala okokuqala kwiNedbank Cup
xa edibana neSuper Eagles emdlalweni ongentsimbi yesithathu emalanga ngomso
eSisa Dukashe Stadium. Nangona iqela laseKomani lingaqhubanga kakuhle nje emidlalweni
yalo eliqela kwi-ABC Motsepe League – kodwa uKapteni walo, uNkosomzi Mbenyana,
ufunge wamunca iintupha ngelithi abadlali baza kudlalela ukuzophula ukuze
kuphakame iChris Hani – indawo elisuka kuyo iqela. Amavarara aneeveki ezimbini
elungiselela umdlalo weNedbank Cup ngoba azimisele ukuyibetha iSuper Eagles ehamba
phambili kwiMotsepe League
yaseFree State.
Nangani Amavarara exikixwe ziingxaki ezibangele ukumka komqeqeshi kutshanje –
kodwa abaphathi bawo baqeshe uMzunani Mgwigwi, owayedlalela uMthatha Bush
Bucks, njengomqeqeshi oza kujongana namakhwenkwe kowona mdlalo obalulekileyo
kwimbali yeqela.

                         Nkosomzi Mbenyana.         Umfanekiso: Bheki Radebe

UMbenyana,
29, odlala esiswini, uxelele I’solezwe lesiXhosa okokuba iqela lakhe liza kudlalela ukuwuphumelela
umdlalo ngoba lizimisele ukuphakamisa indawo yaseChris Hani nangona umdlalo utyhalelwe
eMonti ngenxa yeemeko. “Ndingatsho ndithi siwulungele umdlalo ngoba kudala
siwulindele. Njengokuba besidlala imidlalo yethu yesiqhelo (ABC Motsepe
League), besilungiselela nalo mdlalo weNedbank Cup. Besingaqhubi kakuhle
emidlalweni yethu – kodwa lo umdlalo unomahluko. Kulo wangempelaveki umdlalo
asidlaleli amanqaku; kufuneka kubekho eliphumayo iqela. SingamaJita aseChris
Hani thina kweli qela. Ubaluleke kakhulu kuthi umdlalo weNedbank kwaye siza
kuzama ukuphumelela nakanjani ukuze sigqithele kwinqanaba elilandelayo,”
utshilo uMbenya. Ukhuphiswano likaNedbank liyaziwa jikelele njengeqonga elihle
lokoneka italente yabadlali abaphuma kwiindawo ngeendawo eMzantsi Afrika.

Liqela
elisokolisayo kakhulu iSuper Eagles, ekudala likwiMotsepe League futhi elikhe
ladlala kaliqela kwiNedbank Cup. UMbenyana uthi abadlali bayayazi indlela
eqhuba kakuhle ngayo iSuper Eagles, eFree
State – kodwa lo nto
ayithethi kuthi iza kuhamba lula kubo. “Siyayibona ukuba ikwindawo yokuqala
kwiMotsepe League endaweni yayo (eFree
State). Lo nto ayithethi
kuthi iza kuhamba lula kuthi. Nanjengoko benditshilo ndathi umdlalo wahlukile; indlela
esiza kudlala ngayo iza kuthanda ukwahluka nayo ngoba umdlalo wangempelaveki
unomahluko kweqhelekileyo. Abalandeli bebhola, sicela nisiphe inkxaso
emdlalweni weNedbank Cup. Yizani ngobuninzi xa sisenza imbali yaseChris Hani.
Nangona umdlalo sizwuzise eMonti ngenxa yeemeko – kodwa sicela nisixhase,”
uvale ngaloo mazwi uMbenyana. Kanti yena uNksz. uVuyolwethu Madolo wakwaToyota
uthe: “Siyinkampani yakwaToyota sifuna ukuthi siwaxhasa ngokupheleleyo
Amavarara. Siyazingca ngabadlali beqela lethu.”