UBrandon Truter ubulela ithuba lokuqeqesha AmaZulu agxothe uMcCarthy kwiveki ephelileyo

AmaZulu aqeshe uBrandon Truter njengomqeqeshi olibambela kude kuphele isizini eqhubekayo emva kokugxotha umqeqeshi kwiveki ephelileyo. Iqela laKwaZulu-Natal likhombise umnyango uBenni McCarthy kungalindelwanga ngenxa yokugqwidiza kwalo kule sizini. Oku kwenzeke emva kokuba Usuthu lukhutshwe kwiCAF Champions League. Usihlalo weqela uthe kuye kwanyanzeleka ukuba enze iinguqu ngenxa yeziphumo ezingancumisiyo ezifunyenwe liqela lakhe. AmaZulu akhethe uTruter njengendoda eza kutsala iintambo emidlalweni esixhenxe eshiyekileni. Kuloo midlalo, uMnu. Sandile Zungu, ufuna AmaZulu abe phakathi kwamaqela amane aphambili xa kuvalwa isizini.

UTruter yindoda eyaziwawo ebholeni emva kokususa iSwallows FC kwiGladAfrica Championship wayibeka endaweni entle kwisizini yayo yokuqala kwiDStv Premiership. Uye wagxothwa yiSwallows kunyaka ophelileyo emva kokungaqhubi kakuhle kwayo kwisizini eqhubekayo. “Ndiyakuthanda ukusebenza KwaZulu-Natal. Ndikhe ndasebenza kumaqela afana neRichards Bay neRoyal Eagles. Le ndawo ndiyazi ngabantu bayo abanobubele. Ukuqeqesha AmaZulu kufana nokuzalisekiswa kwephupha kum,” utshilo uTruter emva kokwaziswa kwakhe eThekwini.

“Kumnandi kum ukubalapha. Ndiyalibulela ithuba lokuqeqesha AmaZulu. Liqela elikhulu ekufanele ukuba likhuphisana namaqela amakhulu kweli lizwe xa ujonga imbali yalo etyebileyo. Iqela lisame kakuhle kwiindawo ezininzi nangona iziphumo zingakhange zibe zihle kule isizini. Ndinethemba lokuza notshintsho,” utshilo uTruter. Umqeqeshi uwamkele umsebenzi esazi kakuhle ukuba uMnu. Zungu ulambele impumelelo. “Sijonge ukuvala isizini sisendaweni entle. Ndazi kakuhle ukuba isixhenxe kuphela imidlalo eshiyekileyo. Kodwa kufuneka sizame ngoba usihlalo ufuna ukuvuyisa abalandeli beqela,” utshilo uTruter. AmaZulu aya kudlala umdlalo wokuqala phantsi kukaTrutter ngomhla wesithandathu kwinyanga kaTshazimpuzi neBaroka FC.