Iintshatsheli zeCaf Champions League, iMamelodi Sundowns, siqenyule namhlanje. Ezi zixhiliphothi zasePitoli zithiwe jize ngookracaza bezikipha ezitsha yinkampani eyaziwayo kwicala lokwenza iimpahla kwicandelo lezemidlalo – uPuma. Le kiti intsha izakusetyenziswa yiSundowns kwisizini ka-2017/17. UPuma ngumxhasi osesikweni weMamelodi Sundowns owaqala ngo’2016 othi abanonelele eli qela ngazo zonke iimpahla ezinxitywa ngabadlali ebaleni nangaphandle. Zimbini iikiti eziveliswe nguPuma eziza kusetyenziswa yiDowns kwisizini ezayo. Ngethuba iMamelodi Sundowns iphumelela indebe ye-Absa Premier Soccer League, iCaf Champions League neCaf Super Cup – uPuma ebeyinxalenye yeli qela likaPitso Mosimane.
Isithethi semamelodi Sundowns, uThulani Thuswa, sithethe senjenje: “Ngesi sikipha sethu simthubi siwonga ngaso abalandeli bethu ngoba bona balixhadi lethu xa kukubi naxa kukuhle. Le kiti iluphawu lembali yaBafana Ba Style etyebileyo ebholeni. Abaxahsi bethu, uPuma, usebenzise bonke ubuchephesha bale mihla ngethuba evelisa ezi zikipha. Abadlali bethu bazakuziva bebalulekile kakhulu xa bezinxibile ebaleni nanini na.”
Intloko yezeentengiso kwaPuma, umnumzana uBrett Bellinger, uthe banebhongo ngokuba ngabaxhasi beSundowns. “IiBrazilians zizahlula ngemibala yazo nangokudlala ibhola ebonakalayo futhi enomtsalane,” utshilo uBellinger. Amasandawana azakugaxela isikipha esitsha kraca xa edibana ne-AS Vita Club kumdlalo weChampions League ngomhla wesixhenxe eLucas Moripe Stadium.
URonwen Williams ucelela inkxaso yabalandeli beChiefs nePirates!