Amakhosi atyikitye ifolosi yaseZambia

Amakhosi
atyikitye ifolosi yaseZambia enconywa ngokubba bukhali phambi kweepali kwilinge
lawo lokuzama ukuguqula izinto kwisizini ezayo. Iingxelo zamajelo eendaba zithi
uLazarous Kambole sele evumelene neKaizer Chiefs – into eseleyo ngoku
kukwaziswa kwakhe njengomdlali waseNaturena ngokusesikweni. UKambole, 25, ngurhasatsha
womdlali webhola ekhatywayo odlalela iqela eliphambili ekuthiwa yiZesco United
kwilizwe laseZambia. Mhlawumbi uKambole angasisixhobo esinokuyinceda iChiefs
ebineefolosi ezibuthuntu kwiisizini ezigqithileyo. Amagowuli afakwe nguKambole
kwiisizini ezimbini ezigqithileyo asondele kumashumi amahlanu (48).

Usihlalo weChiefs,
uMnu. Kaizer Motaung, uthembise ngokwenza iinguqu ezibonakalayo kutshanje emva
kokuba iqela lakhe livale isizini yePSL likwindawo yethoba nasemva kokuhlazwa
liqela elincinane, iTS Galaxy – ebethe iChiefs ngo’1-0 emdlalweni wokugqibela
weNedbank Cup kwinyanga ephelileyo eMoses Mabhida Stadium. Ukuza kuthi ga
ngoku, Amakhosi achithe abadlali abaninzi abaquka uHendrick Ekstein, uGustavo
Paez, uBongolethu Jayiya, uRyan Moon nabanye abaninzi.

“Andiqinisekanga
ukuba ndiya kweliphi ngoba maninzi amaqela ebhola ekhatywayo anomdla kum. Kodwa
ndingatsho ukuba iKaizer Chiefs lelinye lawo. Kukho amaqela andifunayo naseTanzania
afana neSimba, elinye lise-Angola. AmaZulu ne-Orlando Pirates ngamanye wamaqela
alapha eMzantsi Afrika. Eyona nto endicinga ukuba ibalulekile yinto ebekwa
etafileni. Nokuba leliphi iqela eliza nento ebonakalayo – ndiza kuya kulo,”
utshilo uKambole kunomathotholo kaSABC. Ebuzwa ngoxinizelelelo kwiChiefs,
uKambole uthe: “Ndiqhelene nalo kwiZesco. Ndikulungele ukumelana nezinto
ezinjalo. Ndiyazi kukho uxinizelelo kwiChiefs – kodwa ndicinga ukuba
ndiyilungele lo nto”.