Namhlanje
liyitshonele emini iKaizer Chiefs. Oku kwenzeke emva kokuba ibethwe yiBidvest
Wits ngegowuli elinye eqandeni emdlalweni obalulekileyo we-Absa Premiership ngenjikalanga
yanamhlanje. NgoLwesine wale veki, iChiefs ibethwe ngo’1-0 yiMamelodi Sundowns
enethuba lokunyuka iye kwindawo yokuqala ukuba ikwazile ukubetha iBaroka FC
emdlalweni oqhubekayo ngoku. Emva kokungabikho kukaSamir Nurkovic noLeonardo Castro
emdlalweni ogqithileyo, uNurkovic ubuyisiwe ngu-Ernst Middendorp emdlalweni
wanamhlanje. Amakhosi ahlasele kwangoko emdlalweni, kufanelekile ngoba
bekunyanzelekile aphumelele umdlalo. Kude kwaphela isiqingatha sokuqala
lingekho iqela elikwazileyo ukubhalisa ebhodini nangona iChiefs ibinawo
amathuba. UNurkovic uphose ithuba engelincede iChiefs emdlalweni.
URicardo Goss
wenze umsebenzi oncomekayo ezipalini encediswa ngamakhwahla afana noThulani
Hlatshwayo noSifiso Hlanti phambi kwakhe. Nurkovic noBernard Parker bazamile
ukubeka uxinizelelo kwiWits – kodwa imizamo yabo ayibanganazo iziqhamo ezihle. Izinto
ziqale ukonakala ngethuba iChiefs iphulukana noDaniel Akpeyi ngengozi
ayifumeneyo. Ungenile uBruce Bvuma uzamile – kodwa ngelishwa, akakwazanga
ukuyinqanda ibhola efakwe ngu-Eva Nga ngomzuzu wokugqibela. Komnye umdlalo
wanamhlanje, iBloemfontein Celtic ibambene ngeqanda
isemsileni wePSL. Iziphumo zomdlalo ophakathi kweSundowns neBaroka ziza
kucacisa okwenzekayo ezantsi naphaya phezulu kwiPSL. Nangona kunjalo, amathuba
weChiefs okuphumelela indebe yePSL aya encipha ngokuncipha kwemidlalo.
UMudau noLorch baweze iDowns emdlalweni weNedbank Cup!