UMzantsi
Afrika uphose ithuba elihle lokubethelela indawo yawo phezulu kuGroup E emva
kokudlala ntanganye neSeychelles exhathisileyo. Ngale njikalanga, iBafana
Bafana ibambene ngeqanda (0-0) neSeychelles kumdlalo wokulwela indawo kwi-2019
AFCON obuseStade Linite. UMzantsi Afrika uye emdlalweni wanamhlanje ukuzithemba
kuphezulu emva kokuvuthulula iSeychelles ngo’6-0 ngoMgqibelo ogqithileyo
eNasrec. Amathuba okuphumelela umdlalo ebemaninzi kwisiqingatha sesibini –
kodwa abadlali bakhe uStuart Baxter boyisiwe kukubeka ibhola emnatheni. Indlela
ebidlala ngayo namhlanje iSeychelles ibingokuhlukanga kanako kwindlela edlale
ngayo kumdlalo ogqithileyo. Into eyahlukileyo kumdlalo wanamhlanje kukuba ixhathise
kwade kwase kugqibeleni kungangenanga gowuli kuyo kwimizuzu engamshumi
alithoba. Ngoku uMzantsi Afrika unamanqaku asibhozo emva kwemidlalo emine –
kodwa kukho iNigeria efuthela emagxeni edlala neLibya kumdlalo ongokuhlwa
namhlanje.
Kuyiwe kwixesha
lokuphumla kungekho qela elikwazileyo ukubhalisa ebhodini. Ngokufanayo
nakumdlalo wokuqala obuseFNB Stadium kwiveki ephelileyo, aBafana Bafana
bawulawule ngokupheleleyo umdlalo. Unozinti weSeychelles, uJerome Dingwall,
ngoyena mdlali obexakekile ngoba ebephantsi koxinizelelo obe lufakwa koogxa
bakhe ngabadlali abafana noPercy Tau, uDino Ndlovu noLebohang Maboe. Nakubeni uMzantsi
Afrika ubudlala ibhola engcono – kodwa ibala ebekudlalelwa kulo belingawuvumeli
umdlalo okhawulezayo oqhelwe ngabadlali bakaStuart Baxter. Njengokuba abadlali
beSeychelles bebehleli emva namhlanje, aBafana Bafana abakwazanga ukugqobhoza
nokusebenzisa kakuhle iikona ezisixhenxe abazifumene kwisigaba sokuqala
somdlalo. Kuye kwanyanzeleka u-Itumeleng Khune avale ibhola ebimbi kanye phambi
kokuphela kwesiqingatha sokuqala.
Amakhwenkwe
kaBaxter athathe apho ebeyeke khona kwisiqingatha sokuqala. ULebo Mothiba uphose
ithuba elihle emva kokunikelwa ibhola entle nguNdlovu phambi kukanozinti. UTau ungcangcazelise
umnatha – kodwa alibalwanga igowuli lakhe ngoba ulifake esendaweni
engafanelekanga. Abadlali beBafana Bafana baqhubele phambi nokudlala umdlalo
omhle futhi bequqa bebuyelela kwiimpondo zeSeychelles – kodwa igowuli
alivumanga ukungena. UDean Furman noRamahlwe Mphahlele bazame konke abaqhele
ukwenza ngaphandle kwempumelelo emdlalweni wanamhlanje. ISeychelles iphantse
yafumana igowuli lempumelelo kodwa ngelishwa layo, ibhola ihambe phambi kwepali
– uKhune ebezishiyile iipali zakhe. Umdlalo uphele kungekho qela elivumileyo
ukugoba iphondo. Ukudlala ntanganye neBafana yinto enkulu kwiSeychelles emva
kokubethwa ngamagowuli amathandathu kumdlalo obungempelaveki egqithileyo.
Bafana Bafana: Itumeleng
Khune, Ramahlwe Mphahlele, Sifiso Hlanti, Buhle Mkhwanazi, Thulani Hlatshwayo,
(captain) Dino Ndlovu, Dean Furman, Lebohang Maboe, Kamohelo Mokotjo, Percy
Tau, Lebo Mothiba.
Amalalela:
Darren Keet, Motjeka Madisha, Thembinkosi Lorch, Aubrey Modiba, Teboho Mokoena,
Innocent Maela, Hlompho Kekana.
Seychelles: Jerome Dingwall, Jones Joubert, Bertrand
Esther, Jude, Jude Naney, Benoit Marie, Nigel Hoaream, Colin Bibi, Colin
Esther, Gervias Waye-hive, Perry Monnaie, Darrel Pamou.
Amalalela:
Romeo Barra, Mike Lesperance, Leroy Coralle, Deeroy Brutus, Nelson Laurence,
Keren Sinon.
Meta AI, wamkelekile kwikhaya lethu lesiXhosa!